28-ամյա Հասմիկ Խաչատրյանի՝ բախտագուշակ Վարսիկի հարսի նկատմամբ ընտանեկան բռնության գործով ամբաստանյալ, Հասմիկի նախկին ամուսին Սարգիս Հակոբյանն այսօր՝ դեկտեմբերի 22-ին, Գավառի ընդհանուր իրավասության դատարանում դատապարտվեց 1.5 տարվա ազատազրման եւ համաներմամբ ազատ արձակվեց դատարանի դահլիճից։ Այս մասին NEWS.am-ի հետ զրույցում ասաց Կանանց աջակցման կենտրոնի արտաքին կապերի պատասխանատու Պերճուհի Կաժոյանը։
«Տուժող կողմն իհարկե դժգոհ է դատավճռից։ Ստացվում է՝ կնոջդ կարող ես 9 տարի ծեծես ու անպատիժ մնաս, նման կերպ կանանց իրավունքների պաշտպանությունը չի կարող իրականացվել, բռնարար մարդը խրախուսվում է, իսկ կանայք ոչ մի կերպ չեն կարողանում արդարադատություն գտնել»,-ասաց Պերճուհի Կաժոյանը։
Նրա խոսքով՝ դատարանը հաշվի չառավ այն փաստը, որ տվյալ դեպքում ընտանեկան բռնության դեպք էր քննվում, եւ շատ մանրամասներ ուղղակի անտեսվեցին։
Կանանց աջակցման կենտրոնի աշխատակիցը նշեց, որ իրենք շարունակելու են պայքարել Հասմիկ Խաչատրյանի իրավունքների վերականգնման համար եւ շուտով կհրապարակեն իրենց հետագա անելիքները։
Նշնենք, որ 28-ամյա Հասմիկ Խաչատրյանը եւ Սարգիս Հակոբյանը ունեն երկու երեխա`6-ամյա որդի եւ 7-ամյա աղջիկ:
Հիշեցնենք, որ Սարգիս Հակոբյանը մեղադրվում է ամուսնական կյանքի ընթացքում կնոջը՝ Հասմիկ Խաչատրյանին խոշտանգելու, պարբերաբար ծեծի ենթարկելու, մարմնական և հոգեկան տառապանք պատճառելու մեջ: Հասմիկը NEWS.am-ի հետ զրույցում պատմել էր, որ 9 տարվա ամուսնական կյանքի ընթացքում ինքը բազմիցս ծեծի է ենթարկվել. ամուսինը մինչև անգամ աթոռը ջարդել է իր թիկունքին ու աթոռի կոտրված մասով հարվածել գլխին: Նա պատմել էր, որ ամուսնու տնից փախչելու օրը դաժան ծեծի էր ենթարկվել, ինչի հետեւանքով պատռվել էր ականջի թաղանթը:
