Հայաստանի պետական ճարտարագիտական համալսարանի մոտ 2013թ. ապրիլին 19-ամյա Տիգրան Հայրապետյանին սպանելու համար 10 տարվա ազատազրկման դատապարտված 17-ամյա Հայկ Աղամալյանի պաշտպանական կողմը դիմել է ՀՀ Վերաքննիչ քրեական դատարան՝ բողոքարկելով առաջին ատյանի կայացրած որոշումը: Այս մասին NEWS.am-ի թղթակցի հետ զրույցում ասաց Հայկի մայրը՝ Նարինե Արիստակեսյանը:
«Ոչ միայն դատավճիռն ենք բողոքարկում, այլեւ դատավորի եւ դատախազի գործողությունները, որ ամբողջ դատաքննության ընթացքում ոչինչ չարեցին՝ պարզելու իրական մեղավորին: Եթե միջնորդությունները բավարարվեին, պարզ կլիներ, որ Հայկը չի սպանել Տիգրանին: Նույնիսկ համալիր փորձաքննություն չնշանակեցին, բացարձակապես ոչ մի բան դատավորը չարեց. մենակ եկավ, լսեց ու գնաց»,- ասաց տիկին Նարինեն:
Հայկի հարազատները շարունակում են պնդել, որ սպանությունը կատարել է Հայկի համադասարանցին՝ Կարեն Հարությունյանը, որին նույնիսկ հարցաքննության չկանչեցին դատարան:
«Հայկին դեպքի վայր տարել է հենց Կարենը, որի հարազատները փող են տվել դատավորին ու հանել Կարենին երկրից: Մեզ այդ մասին Կարենի մտերիմ բարեկամներն են ասել: Մենք էլ գնացինք, հասանք Լճաշեն, որտեղ Կարենենք էին ապրում, պարզվեց՝ տունը ծախել եւ երկրից գնացել են հենց դեպքից մի քանի օր անց»,- ավելացրեց տիկին Նարինեն:
Նա հույս ունի, որ Վերաքննիչ դատարանն արդար որոշում կկայացնի եւ Հայկն ազատ կարձակվի:
Նշենք, որ նոյեմբերի 25-ին Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում Հայկը մեղավոր ճանաչվեց ՀՀ ՔՕ 104-րդ հոդվածի 2-րդ մասի 10-րդ կետով եւ 258-րդ հոդվածի 4-րդ մասով՝ դատապարտվելով 10 տարվա ազատազրկման։
Հիշեցնենք, որ ըստ մեղադրական եզրակացության՝ Հայկ Աղամալյանը 2013թ.-ի ապրիլի 19-ին Տերյան փող. 72շ. հարեւանությամբ մի խումբ անձանց հետ վիճաբանության ժամանակ դանակով հարվածել է Տիգրան Հայրապետյանի կրծքավանդակին եւ նրան ապօրինաբար զրկել կյանքից: