ԵԱՀԿ Մինսկի խմբի ֆրանսիացի համանախագահ Պիեռ Անդրյուն ափսոսանք է հայտնում ԼՂ հակամարտության գոտում միջադեպերի առթիվ:
«2014-ը հակասական էր ԼՂ հակամարտության կարգավորման տեսանկյունից»,-հայտարարել է նա ադրբեջանական APA-ին տված հարցազրույցում:
«Նախագահներ Ալիեւն ու Սարգսյանը երեք անգամ հանդիպել են գագաթաժողովներում, որոնք կազմակերպել են նախագահներ Պուտինը, Օլանդն ու ԱՄՆ պետքարտուղար Ջոն Քերրին, եւ դա ամբողջությամբ արտացոլում է նրանց վերցրած պարտավորությունները»,-ասել է համանախագահը:
Դիվանագետը նշել է, որ դիվանագիտական հաջողություններից բացի, այս տարի շփման գծում եւ երկու երկրների սահմանի երկայնքով իրավիճակի լարվածություն է նկատվել, որի հետեւանքով ավելի շատ մարդ է զոհվել, քան նախորդ տարի:
«Քաղաքացիական բնակչության շրջանում զոհերը, հատկապես նոյեմբերի 12-ի միջադեպը, որի ժամանակ ռազմական ուղղաթիռ էր խոցվել, ինչից կարելի էր խուսափել, ափսոսանք է առաջացնում: Այդ լուրջ միջադեպը եւս մեկ անգամ հաստատեց լարվածության թուլացման անհրաժեշտությունը, վստահության վերականգնումը եւ միջոցների ձեռնարկումը, որպեսզի նման բաներ չկրկնվեն: ԱԳ նախարարների կողմից Բազելում դեկտեմբերի 4-ին ընդունված հայտարարությունը ընդգծում է այդ ամենը»,-նշել է ֆրանսիացի համանախագահը:
Նրա խոսքով՝ հոկտեմբերի 27-ին կայացած փարիզյան գագաթաժողովը հնարավորություն ստեղծեց վերականգնել երկու երկրների նախագահների միջեւ ուղղակի երկխոսությունը: ԵԱՀԿ Մինսկի խմբի երեք համանախագահները եւ ԵԱՀԿ գործող նախագահի անձնական ներկայացուցիչը ընդգրկվեցին բանակցություններում: «Արդյունքները տպավորիչ էին: Նախագահները որոշեցին որքան հնարավոր է շուտ ԿԽՄԿ-ի միջոցով սկսել հակամարտության ժամանակ անհետ կորածների վերաբերյալ տեղեկատվության փոխանակումը: ԿԽՄԿ-ն արդեն սկսել է աշխատանքն այդ ուղղությամբ: Որոշվել է քննարկել նաեւ այլ հարցեր ավելի հարմար ժամանակ, եւ ես վստահ եմ, որ դա շուտով տեղի կունենա:
Միաժամանակ, երեք նախագահները մանրամասն իրար հետ քննարկել են այդ բանակցությունները:
Նախագահ Օլանդը կոչ է արել նախագահներ Ալիեւին եւ Սարգսյանին իրենց ժողովուրդներին պատրաստել խաղաղության: Տարեվերջյան տոները կարող են բարենպաստ շրջան լինել՝ այս տարվա արդյունքների եւ հետագա պլանների մասին մտածելու համար: Բանակցությունները եւ շփումները Մինսկի խմբի միջնորդությամբ կշարունակվեն հունվարին: Մենք հույս ունենք, որ առաջընթաց կլինի այս բարդ գործընթացում եւ կինտենսիվանա երկխոսությունը Հայաստանի ու Ադրբեջանի նախագահների միջեւ: Նրանց միջեւ հանդիպումը տեղի կունենա 2015-ի սեպտեմբերին, ՄԱԿ-ի գլխավոր ասամբլեայի շրջանակներում, ինչպես դա եղավ Փարիզում»,-ընդգծել է համանախագահը:
