Ղազախստանի նախագահ Նուրսուլթան Նազարբաեւը վստահ է, որ Ուկրաինան եւ Ռուսաստանը կկարողանան վերականգնել հարաբերությունները: Նա Մոսկվային եւ Կիեւին կոչ է արել աշխատել փոխզիջում փնտրելու ուղղությամբ:
«Կարծում եմ՝ կարելի է վերականգնել Ռուսաստանի հետ հարաբերությունները, որը հիմնական գործընկեր է: Ուկրաինան մոտ է Եվրոպային եւ, հաշվի առնելով այդ, դրա հետ ասոցացումը միանգամայն հասկանալի է: Ես ավագի եւ ավելի փորձառուի իրավունքով դիմում եմ ե՛ւ Ռուսաստանին, ե՛ւ Ուկրաինային՝ կոչ անելով համատեղ աշխատել փոխզիջում գտնելու ուղղությամբ՝ ստեղծված իրավիճակից դուրս գալու համար, պահպանելով երկրի տարածքային ամբողջականությունը»,- Նազարբաեւի խոսքերն է մեջբերում Ղազախստանի նախագահի մամուլի ծառայությունը:
Նա հույս է հայտնել, որ Ուկրաինան ճգնաժամից դուրս կգա ամրացած եւ «կդառնա հզոր երկիր, ինչպիսին միշտ եղել է»: Նազարբաեւը վստահ է, որ բոլոր կողմերը սատարում են Մինսկի պայմանավորվածությունները, իսկ դրանցում ներառված հարցերը լուծելի են:
Ըստ «Ուկրինֆորմ»-ի, Պորոշենկոյի հետ մամուլի ասուլիսի ընթացքում Նազարբաեւն Ուկրաինայի արեւելքում հակամարտությունը կոչել է «կազմակերպված քաղաքացիական պատերազմ»:
«Այն, ինչ կատարվեց, սարսափելի է Ուկրաինայի համար, որ ոք չէր կարող նույնիսկ վատ երազում պատկերացնել, որ երկրի ներսում կարող է նման բախում եւ կազմակերպված քաղաքացիական պատերազմ լինել»,- հայտարարել է Նազարբաեւը: Նա նաեւ նշել է, որ մինչ ուկրաինացիները «մայդաններով էին զբաղված», կայուն Ղազախստանն «անհավանական հաջողությունների» է հասել:
«Ինտերֆաքս»-ի հաղորդմամբ, բանակցությունների ընթացքում կողմերը պայմանավորվել են Ղազախստանից Ուկրաինա էներգետիկ ածուխի մատակարարման մասին: Ուկրաինայի եւ Ղազախստանի նախագահները նաեւ քննարկել են էներգետիկ անվտանգության ոլորտում համագործակցությունն ակտիվացնելու վերաբերյալ հարցեր: