Տորոնտոյում հայտնի «Բարբերյան սթեյք-հաուզ» ռեստորանի տեր, ազգությամբ հայ Արոն Բարբերյանը ծեծի է ենթարկել իրեն կողոպտել ցանկացող ամրակազմ երիտասարդին: Դեպքը ֆիքսել են ռեստորանի տեսախցիկները: հաղորդում է «Ազատությունը»:
Բարբերյանը տեսայութը տեղադրել է YouTube կայքում, որից հետո պատմությունը հայտնվել կանադական լրատվամիջոցների ուշադրության կենտրոնում:
Ինքը՝ Բարբերյանը դեպքի մասին «Տորոնտո սթար» թերթին տված հարցազրույցում նշել է. «Մարդիկ տարբեր կերպ են արձագանքում նման դեպքերում. ես, օրինակ, կատաղել էի: Երբ նա կանգնեցրեց ինձ ու ճանկեց դրամարկղը, ես տեսա, որ նրա ձեռքում ատրճանակ չկա: Եթե զենք ունենար, ես ձեռքերս վեր էի բարձրացնելու»:
Տեսանյութում երեւում է, թե ինչպես է Բարբերյանը, դրամարկղը ձեռքին, փորձում բացել ռեստորանի դուռը եւ մտնել ներս, երբ նրա մեջքի կողմից մոտենում է ամրակազմ մի տղամարդը ու փորձում խլել դրամարկղը: Հարձակման ենթարկված ռեստորանատերը տղամարդու սվիտերը հագցնում է վերջինիս գլխին ու ձեռքերով, ոտքերով հարվածներ հասցնելով, նրան հրում դուրս՝ մայթի վրա:
Կողոպտիչը, հասկանալով, որ այժմ արդեն ինքն է հայտնվել զոհի կարգավիճակում, փորձում է դիմել փախուստի, սակայն Բարբերյանը չի թողնում: Այդ պահին ռեստորանից դուրս է նետվում աշխատակիցներից մեկը, փորձում է զանգահարել ոստիկանություն, այնուհետեւ սկսում է օգնել ռեստորանատիրոջը:
«Ես չէի ուզում խփել նրան: Պարզապես ուզում էի ստիպել, որ խելոք նստի, մինչեւ ոստիկանները գան»,- ասել է Բարբերյանը
Այդուհանդերձ, կողոպտիչին հաջողվում է դիմել փախուստի:
Տեսանյութում երեւում է, թե ինչպես է միջադեպի ժամանակ փողոցով անցնող մի կին, տեսնելով ռեստորանի առջեւ շաղ եկած թղթադրամները, սկսում հավաքել դրանք, ապա վերադարձնում է ռեստորանատիրոջը:
Բարբերյանը ռեստորանի պաշտոնական Twitter-յան էջում կատակախառն գրառում է արել. «Ահա թե ինչու չի կարելի կատակել մեր Շեֆի հետ: Խմոր հունցող Արոն Բարբերյանը իրեն գողի տեղ դրած մեկին կարգին հունցել է այսօր առավոտյան»:
