Դերասան Վարդան Պետրոսյանի մասնակցությամբ վթարի գործով դատական նիստը, որ նշանակված էր այսօր՝ դեկտեմբերի 25-ին, հետաձգվել է, քանի որ Վարդան Պետրոսյանի առողջական վիճակը վատացել է: Այս մասին NEWS.am-ի հետ զրույցում ասաց ամբաստանյալի պաշտպան Նիկոլայ Բաղդասարյանը:
«Առողջական վիճակը վատթարանալու պատճառով նրան մեկուսարանից չեն կարողացել դատարան տեղափոխել: Տաքությունն է բարձրացել, բայց բժիշկները դեռ չեն պարզել, թե որն է պատճառը»,- նշեց պաշտպանը:
Պաշտպանը կարծում է, որ հաջորդ դատական նիստը կլինի 2015թ-ին:
Հիշեցնենք, որ նախորդ դատական նիստին տուժողների ներկայացուցիչ Ռուբեն Բալոյանը միջնորդեց վերսկսել դատաքննությունը և Վարդան Պետրոսյանից ավելի քան 12 մլն դրամի գանձելու վերաբերյալ քաղաքացիական հայց ներկայացրեց:
Հիշեցնենք, որ ըստ մեղադրական եզրակացության՝ Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում, Կոտայքի մարզի Սարալանջ գյուղի կողմից դեպի Երեւան ուղղությամբ վարելիս «ԲՄՎ-320» մակնիշի մեքենայով բախվել է «Վազ 21214» մակնիշի մեքենայի հետնամասին։ Վթարի հետեւանքով «Վազ-21214» մակնիշի մեքենայի ուղեւորներ Էդվարդ եւ Էդգար Հակոբյանները մահացել են, ուղեւորներ Տաթեւիկ Հակոբյանը, Հայկ Հակոբյանը, էմմա Հակոբյանը, ինչպես նաեւ վարորդ Արթուր Հակոբյանն ստացել են վնասվածքներ: Վարդան Պետրոսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասի հատկանիշներով՝ «Ճանապարհային երթեւեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ»։ Տուժող կողմը փորձում է ապացուցել, որ Վարդան Պետրոսյանը վթարի պահին եղել է ալկոհոլի ազդեցության տակ եւ գերազանցել է թույլատրելի արագությունը։ Դերասանը հերքում է այդ վարկածը եւ իրեն հերթին փորձում է ապացուցել, որ տուժող կողմի մեքենան կայանած է եղել ոչ թե ճանապարհի կողնակին, այլ երթեւեկելի գոտում, ունեցել է անսարքություններ։