Ավան եւ Նոր Նորք վարչական շրջանների ընդհանուր իրավասության դատարանում շարունակվում է կաշառք վերցնելու մեջ մեղադրվող՝ Նոր Նորքի զինկոմ Ռաֆայել Զախարյանի գործով դատավարությունը:

NEWS.am-ի թղթակցի հետ զրույցում Զախարյանի փաստաբան Արմեն Խաչատրյանը հայտնեց, որ ապացույցներն են հետազոտվում:

«Նյութում առկա բոլոր ապացույցներն են ուսումնասիրվում այս փուլում: Գործում առկա է տեսագրություն, որտեղ մարդը մուտք է գործում Զախարյանի աշխատասենյակ, խոսակցություն է գնում, եւ հանկարծակի այդ մարդը ձեռք տանում է գրպանը եւ ինչ-որ բան հանում»,- ասաց փաստաբանը:

Նա պնդեց նաեւ, որ այստեղ կաշառք վերցնելու մասին խոսք լինել չի կարող, նույն հաջողությամբ այդ մարդն «իր գրպանից կարող էր զենք հանել»: Նշենք, որ Զախարյանն իրեն առաջադրված մեղադրանքը չի ընդունում:

Հաջորդ դատական նիստը տեղի կունենա դեկտեմբերի 26-ին:

Նշենք, որ ըստ մեղադրական եզրակացության՝ Ռաֆայել Զախարյանը 2014թ. մարտի 17-ին իր աշխատասենյակում, Երեւան քաղաքի Ավան 7 փող. 45 տան բնակիչ Գագիկ Վարդանյանից, որդու՝ Ալբերտ Վարդանյանի օգտին առողջական վիճակի բերումով պահեստազորում հաշվառելու, դրանով իսկ զինվորական ծառայության զորակոչից վերջնականապես ազատելու դիմաց պահանջել է առանձնապես խոշոր չափերով՝ 1.659.840 ՀՀ դրամին համարժեք 4000 ԱՄՆ դոլար կաշառք: Երկու օր անց Զախարյանը նույն զինկոմիսարիատի զորակոչային բաժանմունքի պետի աշխատասենյակում Գ.Վարդանյանից ստացել է 3900 ԱՄՆ դոլար:

Ռաֆայել Զախարյանին մեղադրանք է առաջադրվել Քրեական օրենսգրքի 311-րդ հոդվածի 4-րդ մասի 2-րդ կետով եւ 235-րդ հոդվածի 1-ին մասով: Առաջինը նախատեսում է ազատազրկում՝ 5-10 տարի ժամկետով` գույքի բռնագրավմամբ կամ առանց դրա: Երկրորդը պատժվում է կալանքով՝ առավելագույնը երեք ամիս ժամկետով, կամ ազատազրկմամբ՝ առավելագույնը երեք տարի ժամկետով: Նա կալանավորված է:

Հիշեցնենք, որ կալանավորված Նոր-Նորքի զինվորական կոմիսար, գնդապետ Ռաֆայել Ռուբենի Զախարյանը Գարիկ Գաբրիելյանի՝ Գելի հորաքրոջ որդին է: