Այս տարի նախապես հերթագրված շուրջ Ձմեռ պապ եւ Ձյունանուշից սերտիֆիկատ է ստացել մոտ 40-ը: Այս մասին NEWS.am-ի թղթակցի հետ զրույցում ասաց Երեւանի քաղաքապետարանի տեղեկատվության եւ հասարակայնության հետ կապերի վարչության պետ Արթուր Գեւորգյանը:

Նա նշեց, որ սերտիֆիկատ ստացածներից 7-ը սիրված մուլտհերոսներ են: Արթուր Գեւորգյանն ասաց, որ արդեն 3-4 տարի է՝ Երեւանի քաղաքապետարանը անվճար հիմունքներով կազմակերպում է հավաստագրերի տրամադրման գործընթաց: Նախապես հերթագրվում են Ձմեռ պապերը, Ձյունանուշները, մուլտհերոսները: Արթուր  Գեւորգյանն ասաց, որ մասնագիտացած խումբը գնահատում է նրանց մի շարք չափանիշներով՝ հանդերձանք, տեսք, խոսքի վարպետություն, դերասանական հմտություններ, շփվելու կուլտուրա եւ այլն:  Ըստ որում՝ եթե այս տարի այդ անձը ստացել է հավաստագիր, դա չի նշանակում, որ կարող է դրանով գործունեություն ծավալել նաեւ մյուս տարի, ամեն տարվա համար պետք է դիմի: Արթուր Գեւորգյանն ասաց, որ նպատակն այն է, որ կենտրոնական փողոցներում լինեն ցիվիլ տեսք ունցեղ Ձմեռ պապիկներ, Ամանորյա հերոսները խմած, չսափրված, ցնցոտիներով չշրջեն: Իսկ այն հերոսները, որոնք չունեն սերտիֆիկատ եւ գործունեություն կծավալեն կենտրոնական փողոցներում, Արթուր Գեւորգյանի խոսքով՝ դա կարող է դիտարկվել վարչական իրավախախտում եւ ենթարկվել տույժի: Նա նշեց, որ ամբողջ դաշտը չեն կարող հսկել, բայց գոնե այս փոքր կանոնակարգումով փորձում են Ամանորյա հերոսների հեքիաթային կերպարը պահպանել երեխաների համար:

Ավելի վաղ NEWS.am-ը անդրադարձել էր  Ամանորի գլխավոր հերոսներին՝ Ձմեռ պապին եւ Ձյունանուշին, հարցախույզ էինք անցկացրել նման ծառայություններ առաջարկող ընկերությունների շրջանում՝ պարզելու գները, պատվերները եւ այլ հետաքրքիր մանրամասներ: http://news.am/arm/news/245132.html