Վրացական կողմը լավ է վերաբերվում Հայաստանում նոր ՋԷԿ-ի կառուցման նախագծին: Այս մասին NEWS.am-ի թղթակցի հետ զրույցում հայտարարեց Վրաստանի էներգետիկայի փոխնախարար Մարիամ Վալիշվիլին:
Նախարարությունը չի հանդիպել նախագծի մենեջեր, վրացի գործարար Թեյմուրազ Կարչավայի հետ, քանի որ, ըստ նրա, ծրագիրն իրականացվում է Հայաստանում: «Մենք գիտենք, որ պարոն Կարչավան հետաքրքրված է Անակլիայում նավամատույցի զարգացմամբ, հետեւաբար, նա ցանկանում է մասնակցել գործընթացների, որոնք նախատեսված են Վրաստանի էկոնոմիկայի նախարարության կողմից: Բայց նախագծի էներգետիկ հատվածը Հայաստանում է, եւ հարցն իրավասու է հայկական կողմը լուծել»,- պարզաբանեց Վալիշվիլին:
Հիշեցնենք, որ Հայաստանի կառավարությունը օգոստոսի 14-ի նիստում հավանության արժանացրեց «Anaklia IEP Holding» ընկերության հետ համաձայնագիրը, որը վերաբերում է «Ջեներալ Էլեկտրիկ» գազային տուրբիններով 270 ՄՎտ հզորությամբ երկու էներգաբլոկներից կազմված ջերմակայանի շինարարությանը: Նախագիծը 600 մլն է գնահատվում:
Ավելի վաղ ընկերության գլխավոր տնօրեն Թեյմուրազ Կարչավան վրացական լրատվամիջոցներին հայտնել էր, որ էլեկտրակայանը կառուցվում է՝ վրացական Անակլիա քաղաքի նոր նավամատույցին էլեկտրաէներգիա մատակարարելու համար