Բելառուսի իշխանությունները ՌԴ գյուղնախարարություն փաստաթուղթ են ուղարկել կաթի եւ կաթնամթերքի մատակարարման մասին, որոնցում բոլոր գները ամերիկյան արժույթով են նշված, գրում է «Իզվեստիան»:
ԱՄՆ դոլարի փոխարժեքը փաստաթղթում նշված է 43 ռուբլի: Մատակարարումների ենթադրյալ ծավալը կկազմի 956 հազար տոննա:
Նշվում է նաեւ, որ դեկտեմբերի 3-ից Բելառուսի գյուղատնտեսության նախարարությունը կաթի համար արտահանման նվազագույն գներ է սահմանել դոլարով: Ընդ որում՝ հաշիվները դոլարով են ներկայացվում, սակայն մատակարարումների դիմաց վճարում են նախկինի պես ռուբլով:
Ավելի վաղ հաղորդվել էր, որ Բելառուսի նախագահ Ալեքսանդր Լուկաշենկոն հայտարարել է Ռուսաստանի հետ դոլարով կամ եվրոյով հաշիվներ վարելու մտադրության մասին: