Դժվար է հավատալ  հայերին ուղղված Թուրքիայի վարչապետ Ահմեդ Դավութօղլուի կոչին. մենք տեսնում ենք, որ Անկարան չի հրաժարվել Հայաստանի նկատմամբ նախապայմանների քաղաքականությունից: Այդ մասին NEWS.am-ի թղթակցին հայտարարել է Գիտությունների ազգային ակադեմիայի արեւելագիտության ինստիտուտի տնօրեն թուրքագետ Ռուբեն Սաֆրաստյանը:

Նա թերահավատորեն է վերաբերում Դավութօղլուի անկեղծությանը եւ դժվարանում է դրական գնահատել վերջինսի քայլը: Հայ-թուրքական հարաբերությունների կարգավորման նկատմամբ Թուրքիայի քաղաքականությունը անփոփոխ է մնացել: «Մյուս կողմից. Թուրքական կողմը փորձում է նոր հնարքներ կիրառել Հայոց ցեղասպանության ճանաչմանը խոչընդոտելու համար», - ընդգծել է Ռուբեն Սաֆրաստյանը:

Հիշեցնենք, որ  Թուրքիայի վարչապետ Ահմեդ Դավութօղլուն Հրանտ Դինքի սպանության 8-րդ տարելիցի հետ կապված հայտարարություն է տարածել՝ կոչ անելով հայերին նոր սկզբի հիմքեր դնել։ Նա մասնավորապես հայտարարել է. «Երկու տեղաբնիկ ժողովուրդներ կարող են հասնել միմյանց հասկանալու եւ միասին ապագային նայելու հասունությանը։ Մի աշխարհագրական վայրում ապրող եւ երկար ժամանակ պատմությունը կիսող հայերը եւ թուրքերը բոլոր հարցերը միայն իրար մեջ կարող են խոսել, լուծման ճանապարհներն էլ միասին կարող են փնտրել։ Այս պատճառով անհրաժեշտ է, որ փոխադարձ վստահության եւ համագործակցության հասկացություն զարգացնենք, 800 տարվա համատեղ պատմության լույսի տակ միմյանց նորից ճանաչենք եւ մարդկային հարաբերությունների մեջ լինենք։ Դրա համար մեր հայ բարեկամներին հրավիրում ենք ավելի շատ այցելել Թուրքիա՝ փոխադարձ կարծրատիպերը վերացնելու համար։