Ամերիկացին 40 տարի բանտում է անցկացրել չգործած հանցանքի համար։ 70-ամյա Ջոզեֆ Սլեջը Հյուսիսային Կարոլինայի բանտից ազատվել է այն բանից հետո, երբ դատավորների կոլեգիան որոշել է, որ նրան սխալմամբ են դատել Էլիզաբեթթաունի բնակչուհու եւ նրա դստեր սպանության համար։

Դատարանը հիմք է ընդունել ԴՆԹ-ի փորձագետի եզրակացությունը, ըստ որի՝ Սլեջի մեղավորությունն ապացուցող ոչ մի հետք չկա։ Բացի այդ, նախկին վկաներից մեկը հրաժարվել է իր ցուցմունքներից։
Հաղորդվում է, որ դատարանի որոշումն ընթերցելուց հետո Սլեջը մի պահ քարացել է, հետո գրկել փաստաբանին եւ իր ընտանիքի անդամներին, որոնք ներկա էին լսումներին։ Նա ասել է, որ անհամբեր սպասում է այն պահին, երբ կքնի իսկական մահճակալին, կլողա լողավազանում, հայտնում է lenta.ru-ն՝ վկայակոչելով Associated Press-ը։

Ժոզեֆինա Դեւիսը եւ նրա դուստր Էյլինը իրենց տանը սպանված էին գտնվել այն բանից հետո, երբ Սլեջը փախել էր ուղղիչ գաղութից, որտեղ  գողության համար 4 տարվա պատիժն էր կրում։