Պաշտպանության նախարարության Վարդենիսի զինվորական հոսպիտալից երկկողմանի թոքաբորբ ախտորոշմամբ, մարմնական վնասվածքներով ՀՀ ՊՆ կենտրոնական կլինիկական զինվորական հոսպիտալ 2014թ.-ի հունվարի 13-ին տեղափոխված N զորամասի ժամկետային զինծառայող, նորակոչիկ Մհեր Խլղաթյանի գործով դատավորը որոշում է կայացրել բերման ենթարկել նորակոչիկին, որովհետեւ վերջինը հրաժարվում է ներկայանալ դատարան: Այս մասին NEWS.am-ի թղթակցի հետ զրույցում ասաց գործով կալանավորված բուժծառայության պետ, կապիտան Արման Թադեւոսյանի փաստաբան Լիպարիտ Սիմոնյանը:
«Փորձագետի խոսքով՝ Մհեր Խլղաթյանը դատաքննական ցուցմունքը որեւէ նշանակություն չի կարող ունենալ գործում, քանի որ նա չի կարողանում ճիշտ ընկալել իրավիճակը եւ վերարտադրել կատարվածը: Բայց դատավորը որոշել է բերման ենթարկել նրան դատարան, քանի որ կարգն է այդպիսին: Պաշտպանական կողմն էլ կարծում է, որ նույնիսկ Մհերի նախաքննական ցուցմունքը պետք չէ հիմք հանդիսանա դատաքննության, այնուհետեւ արդեն դատավճռի համար»,- ասաց Լիպարիտ Սիմոնյանը:
Նրա խոսքով՝ փետրվարի 4-ին նշանակված դատական նիստին ամենայն հավանականությամբ 18-ամյա նորակոչիկը բերման կենթարկվի:
Հիշեցնենք, որ 2014թ. հունվարի 13-ին, ժամը 02-10-ի սահմաններում ՀՀ ՊՆ Վարդենիսի զինհոսպիտալից երկկողմանի թոքաբորբ ախտորոշմամբ, մարմնական վնասվածքներով ՀՀ ՊՆ կենտրոնական կլինիկական զինվորական հոսպիտալ էր տեղափոխվել N զորամասի ժամկետային զինծառայող, նորակոչիկ Մհեր Արմենի Խլղաթյանը:
Գործի շրջանակներում բուժծառայության պետ, կապիտան Արման Դավիթի Թադեւոսյանը կալանավորվել էր հունվարի 17-ին, նրան մեղադրանք էր առաջադրվել Քրեական օրենսգրքի 358.1 հոդվածի 3-րդ մասի 1-ին մասի (մի խումբ անձանց կողմից զինվորական ծառայության պարտականությունները կատարելու կապակցությամբ ստորադասին նկատմամբ բռնություն գործադրելը): Զորամասի ժամկետային զինծառայող, կրտսեր սերժանտ Վահե Արմենի Օհանյանը եւ դասակի հրամանատար, ավագ լեյտենանտ Հրաչ Սամվելի Մնացականյանը կալանավորվել էին հունվարի 18-ին, նրանց մեղադրանք էր առաջադրվել 358.1 հոդվածի 3-րդ մասի 1-ին կետի (մի խումբ անձանց կողմից զինվորական ծառայության պարտականությունները կատարելու կապակցությամբ ստորադասին նկատմամբ բռնություն գործադրելը) եւ 358.1 հոդ. 2-րդ (զինվորական ծառայության պարտականությունները կատարելու կապակցությամբ ստորադասի նկատմամբ բռնություն գործադրելը) մասերով: