Լեռնային Ղարաբաղի Հանրապետության Քաշաթաղի շրջանում այսօր՝ հունվարի 24-ին, վաղ առավոտյան ողբերգական ավտովթար է տեղի ունեցել, որի հետեւանքով մեկ մարդ մահացել է: Այս մասին NEWS.am-ին հայտնեցին ԼՂՀ ոստիկանության լրատվական ծառայությունից:
Նրանց փոխանցմամբ՝ «Նիվա» մակնիշի ավտոմեքենայի վարորդը դեռեւս անհայտ պայմաններում դուրս է եկել ճանապարհի երթեւեկելի գոտուց եւ գլորվելով՝ հայտնվել ձորում: Վթարի հետեւանքով, ըստ նախնական տեղեկությունների, մեկ հոգի մահացել է: Դեպքի հանգամանքները ճշտվում են:
«Հայաստանի Հանրապետության քաղաքացիներ են եղել վթարի ենթարկվածները»,- հայտնեցին ոստիկանությունից:
Արտակարգ իրավիճակների նախարարության մամուլի ծառայությունից էլ NEWS.am-ը տեղեկացավ, որ վթարի հետեւանքով մահացել է 19-ամյա Ա.Մ.-ն, իսկ տուժածներ 40-ամյա Ժ.Ղ.-ն եւ 41-ամյա և Գ.Մ.-ն տեղափոխվել են հիվանդանոց:
Փրկարարական աշխատանքների կատարման ժամանակ փրկարարներից մեկը ստացել է վնասվածք: