Երեւանի «Էրեբունու» նախկին շուկայի տարածքում հունվարի 17-ին տեղի ունեցած փլուզուման հետեւանքով վնասներ կրած խանութների սեփականատերերը փոխհատուցում են ստացել: Այս մասին այսօր՝ հունվարի 24-ին, NEWS.am-ի հետ զրույցում ասաց տարածքի խանութներից մեկի վարձակալ Գագիկ Հարությունյանը` նշելով, որ իր տեղեկություններով փոխհատուցել են նաեւ մյուս կրպակատերերին:
«Ոմն Լյովա անունով մեկը, որը ներկայացել է որպես շուկայի տարածքի տնօրեն, փոխհատուցել է իմ կրած վնասը: 300 հազար դրամ էր, ամբողջը փոխհատուցել են»,- ասաց Գագիկ Հարությունյանը:
Գագիկ Հարությունյանը մյուս կրպակատերերի պես մտադիր է խանութ վարձակալել մեկ այլ տարածքում: Նախկին՝ փլուզման վայրում, որտեղ խանութներն էին, այժմ շինարարական աշխատանքներ են իրականացվում: Տարածքի հսկիչը NEWS.am-ի հետ զրույցում ասաց, որ այնտեղ պատրաստվում են «Երեւան Սիթի» կառուցել:
«Մի քանի տասնյակ կամազներ եկան, հող լցրին տարածքում: Աշխատանքներն առայժմ չեն շարունակվում: Մի որոշ ժամանակ հետո կրկին կսկսվեն»,- ասաց Գագիկ Հակոբյանը:
Հիշեցնենք, որ հունվարի 17-ին՝ «Էրեբունու» նախկին շուկայի տարածքում փլվածք էր տեղի ունեցել, ինչի հետեւանքով Էրեբունու փողոցի երկայնքով կառուցված խանութներից 5-ը քանդվել եւ սահել են փոսը (մոտ 15 մ): Խանութների աշխատողները NEWS.am-ի հետ զրույցում ասել էին, որ իրենք նախազգուշացվել էին եւ մի քանի օր առաջ գույքի մի մասը հանել խանութներից: Սեփականատերերի մի մասը նշել էին, որ իրենք դեռ ամիսներ առաջ վաճառել են իրենց տարածքները անհատի, որի անունը չէին նշել։