Ավելի քան հազար մարդ մնացել է առանց էլեկտրականության Ատլանտյան օվկիանոսում գտնվող Fred Olsen Cruise Lines ընկերությանը պատկանող Boudicca նավում: Նավը, որում հրդեհ է բռնկվել, գտնվում է Մարոկկոյի մոտ:
Հրդեհը բռնկվել է առավոտյան ժամը 4-ին, մեխանիկական բաժնում: Տեղի ունեցածի հետեւանքով անջատվել է էլեկտրամատակարարումը եւ շարժիչները դադարել են գործել: Որոշ ժամանակ անց նավի անձնակազմը միացրել է էլեկտրականության պահեստային աղբյուրը:
«Հրդեհն արդեն մարվել է, ոչ ոք չի տուժել»,-ասել է նորվեգական օպերատոր ընկերության ներկայացուցիչ Ռեյչել Ջեքսոնը, հաղորդում է ՌԻԱ նովոստին:
Նրա խոսքով՝ նավը հիմա առաջ է ընթանում երկու հիմնական շարժիչների օգնությամբ, միացված է նաեւ պահեստային շարժիչը, երկու շարժիչներ վերանորոգման կարիք ունեն: