Հոնկոնգի ոսկերչական խանութներից մեկում հանդուգն գողություն է կատարվել: Թանկարժեք վզնոցի գողության մեջ կասկածում են 12-ամյա մի աղջնակի, ով այն ցուցափեղկից առեւանգել է հենց վաճառողի քթի տակից:
Տեղական լրատվամիջոցների փոխանցմամբ, միջադեպը տեղի է ունեցել հունվարի 23-ին: Տեսահսկման խցիկներն արձանագրել են երկու կնոջ, մի տղամարդու եւ աղջնակի, ովքեր որպես ընտանիք մտել են ոսկերչական խանութ:
Ըստ Informing-ի, մինչ մեծահասակները շեղել են վաճառողի ուշադրությունը, աղջիկը հասցրել է գանձապահի սեղանից վերցնել բանալին, բացել ցուցափեղկը եւ հափշտակել խանութի ամենաթանկ զարդը՝ 5.78 մլն դոլար արժողությամբ ադամանդե վզնոցը:
Ներկայում ոստիկանությունը փնտրում է հանցավոր խմբին: Չնայած տեսահսկման խցիկներն արձանագրել են գողությունը, սակայն խմբի անդամները դեմքերը չեն երեւում: Ակնհայտ է, որ հանցագործությունը մանրակրկիտ նախապատրաստված է եղել:
