Բրիտանացի կոմիկ Ռոուեն Ատկինսոնը, որը հայտնի է միստր Բին կեղծանվամբ, վաճառում է սպորտային McLaren F1 GTR-ը մեքենաների իր հավաքածուից: Դերասանը մեքենան գնահատել է 10 մլն ֆունտ ստեռլինգ, գրում է The Independent-ը:
Ատկինսոնը մեքենան գնել է շուրջ 10 տարի առաջ, իսկ հիմա, ըստ նրա, «ժամանակն է այն մեկ ուրիշի համար մատչելի դարձնելու»:
McLaren F1 GTR-ի առավելագույն արագությունն է 240 մղոն/ժամ (380 կմ/ժ): 10 տարվա շահագործման ընթացքում ավտոմեքենան շուրջ 41 հազար մղոն (66 հազար կմ) է անցել, փոխանցում է Lenta-ն:
Այդ թանկարժեք մեքենայով Ատկինսոնը երկու անգամ վթարի է ենթարկվել: 1999 թ. ամբողջությամբ վնասվել էր մեքենայի առաջնամասը, վերանորոգումն արժեցել էր 100 հազար ֆունտ: 2011թ. կոմիկը կրկին այդ մեքենայով ծանր վթարի էր ենթարկվել, մեքենան ծառին եւ հեռագրասյանն էր բախվել, իսկ հետո՝ բռնկվել:
Վերանորոգումը տեւել է մեկ տարի եւ արժեցել մեկ մլն ֆունտ ստեռլինգ: Ըստ The Independent-ի՝ այն ժամանակ դա ռեկորդային գումար էր մեքենայի նորոգման համար: McLaren F1 GTR-ի նախնական արժեքն է 650 հազար ֆունտ:
Ռոուեն Ատկինսոնը հայտնի է որպես սպորտային մեքենաների մոլի երկրպաագու: Նրա ավտոտնակում կա 13 մեքենա, այդ թվում նաեւ անցյալ դարի 50-ականների մոդելներ: Բինը պարբերաբար հոդվածներ է գրում մեքենաներին վերաբերող ամսագրերում:
