Լեռնային Ղարաբաղի հակամարտության գոտում զինադադարի հաստատման 20-րդ տարեդարձին՝ Ադրբեջանի կողմից ռազմատենչ, սադրիչ հռետորաբանությունը, հրադադարի ռեժիմի բազմաթիվ կոպտագույն խախտումները, տարվա ընթացքում անընդմեջ կրկնվող դիվերսիոն գործողությունները Հայաստանի եւ Ադրբեջանի սահմանին ու Արցախ – Ադրբեջան շփման գծում նոր թափ ստացան: Այդ մասին նշվում է ՀՀ ԱԳՆ տարեկան հաշվետվությունում:
Ըստ ԱԳՆ-ի, դրանք Բաքվի ապակառուցողական կեցվածքի, բանակցային գործընթացի էությունը խեղաթյուրող հայտարարությունների, միջոնրդների առաջարկությունների շարունակական մերժման հետ միասին թույլ չտվեցին առաջընթաց գրանցել ինչպես հիմնախնդրի կարգավորման հիմնարար սկզբունքների շուրջ համաձայնության հասնելու, այնպես էլ վստահության ամրապնդման վերաբերյալ միջազգային հանրության կոչերն իրականություն դարձնելու գործում:
Աննախադեպ հանցավոր սադրանք էր նոյեմբերի 12-ին Ադրբեջանի զինված ուժերի կողմից Արցախի պաշտպանության բանակի` ուսումնավարժական թռիչք իրականացնող ուղղաթիռի խոցումը, որը խլեց երեք երիտասարդ զինծառայողի կյանք: Ադրբեջանական զինուժը գրեթե տասն օր շարունակ ուղղաթիռի անկման վայրը պահեց ինտենսիվ կրակի տակ` թույլ չտալով փրկարար խմբերին, ԵԱՀԿ, Կարմիր խաչի միջազգային կոմիտեի ներկայացուցիչներին՝ տարհանելու զոհված օդաչուների մարմինները։ Դրանով էր պայմանավորված ԵԱՀԿ Մինսկի խմբի համանախագահների նոյեմբերի 19-ի համատեղ հայտարարությունը, որով խորը մտահոգություն էր արտահայտվում՝ ուղղաթիռի անկման վայր մարդասիրական մուտքի արգելափակման կապակցությամբ:
