Սոցիալ-դեմոկրատ Հնչակյան կուսակցության «Սարգիս Տխրունի» ուսանողական-երիտասարդական միության մի քանի տասնյակ անդամներ այսօր՝ հունվարի 26-ին, արտաքին գործերի նախարարության մատո բողոքի ակցիա անցկացրին՝ նախարարից պահանջելով անցնել ակտիվ գործողությունների միջազգային հանրության շրջանում՝ Ադրբեջանի կողմից իրականացվող արկածախնդիր գործունեությունը կանխելու համար:
«Պարոն նախարար, 2015թ.-սկզբից Ադրբեջանը շարունակում է իր ագրեսիվ գործողությունները Տավուշի եւ Արցախի ողջ երկայնքով, ինչի հետեւանքով այս տարի զոհվել են տասնյակից ավելի զինծառայողներ: Մենք այդպես էլ ականատես չեղանք, որ ԱԳՆ-ն հրավիրի ԵԱՀԿ ներկայացուցիչներին, Ռուսաստանի, Ֆրանսիայի եւ ԱՄՆ դեսպաններին՝ նրանց հետ քննարկելու իրավիճակը: Հայաստանն այս պահին չհայտարարված պատերազմի մեջ է, իսկ արտաքին գործերի նախարարությունը կրկին աչքի է ընկնում իներտ, տեղ-տեղ չափից ավելի զգուշավոր գործողություններով»,- ԱԳ նախարարության մոտ Նալբանդյանին ուղղված նամակն ընթերցեց միության վարչության անդամ Ռոման Ծատինյանը:
Երիտասարդները ԱԳՆ շենքի մոտ էին տարել «Մի աղերսիր, այլ պահանջիր» գրությամբ պաստառ: Հավաքվածները նախարարության մոտից երթով շարժվեցին դեպի Հայաստանում ՄԱԿ-ի գրասենյակ, որտեղ նույնպես նամակ հանձնեցին՝ հորդորելով քայլեր ձեռնարկել եւ կանխել Ադրբեջանի հետագա ռազմական գործողությունները:
