«Բանդայի» պարագլուխ համարվող, 15 տարվա ազատազրկման դատապարտված Արտուշ Հակոբյանի փաստաբան Հովիկ Արսենյանը հունվարի 26-ին բողոք է ներկայացրել ՀՀ Վերաքննիչ քրեական դատարան:
«Հայաստանում դատարաններից բացարձակապես հույսեր եւ ակնկալիքներ չկան, սակայն սրանք քայլեր են, որոնք պետք է կատարել: Սա միակ գործն է լինելու, որ ես դիմելու եմ Մարդու իրավունքների եվրոպական դատարան»,- NEWS.am-ի հետ զրույցում ասաց փաստաբանը:
Նրա խոսքով՝ Արտուշ Հակոբյանը պատիժը շարունակում է կրել «Երեւան Կենտրոն» քրեակատարողական հիմնարկում:
Նշենք, որ Երեւանի Կենտրոն եւ Նորք Մարաշ համայնքների ընդհանուր իրավասության դատարանը դեկտեմբերի 26-ին «Բանդայի» պարագլուխ համարվող Արտուշ Հակոբյանին դատապարտեց 15, Դավիթ Գալստյանին եւ Սամվել Դավթյանին՝ նույնպես 15, Արթուր Մանուկյանին՝ 11 տարվա ազատազրկման՝ առանց գույքի բռնագրավման:
Հիշեցնենք, որ 2011թ. սեպտեմբերի 23-ին ոստիկանության կազմակերպված հանցագործության դեմ պայքարի վարչության աշխատակիցները ձերբակալել էին 16 անձի, որոնցից 11-ին ավելի ուշ ազատ էին արձակել: Կալանավորված Արտուշ Հակոբյանը, Քյարամ Ամոյանը, Արթուր Մանուկյանը, Դավիթ Գալստյանը եւ Սամվել Դավթյանը մեղադրվում են բարձրաստիճան պաշտոնատար անձանց բնակարաններում, առանձնատներում ավազակային հարձակումներ իրականացնելու համար: Ամբաստանյալները պնդում են, որ իրենք մեղավոր չեն, գործը բարդել են իրենց վրա։