«Շրջանառության հարկի մասին» օրենքի դեմ բողոքող առեւտրականները հրաժարվում են 10 հոգանոց խմբով հանդիպել վարչապետի հետ՝ պահանջելով, որ վերջինը հենց շենքի բակում հանդիպի բոլոր բողոքողներին:
NEWS.am-ի թղթակիցը հաղորդում է, որ քիչ առաջ առեւտրականներին մոտեցավ կառավարության քաղաքացիների ընդունելության եւ դիմումների քննարկման վարչության պետ Ալեքսանդր Ղազարյանը: Նա հայտարարեց, որ ժամը 13:30-ին Հովիկ Աբրահամյանը պատրաստ է հանդիպել ցուցարարներից 10-ի հետ, սակայն հավաքվածները հրաժարվեցին:
«Ժողովուրդն ուզում ա՝ պետական մարմինների, վարչապետի ձայնը լսի: Մենք բոլորս մեկ ենք, թող ինքն իջնի, մենք հազարավոր ենք, ինքը՝ մեկը: Թող իջնի եւ նայելով մեզ՝ խոսի: Եթե ուզում ա, թող խաբի, այլեւս չի կարող»,- կառավարության շենքի մոտ հայտարարեց ակցիայի մասնակիցներից Արտակ Խաչատրյանը:
Փոխարենը «Փոքր ձեռներեցությամբ զբաղվողների միություն» ՀԿ-ի նախագահ Ստեփան Ասլանյանն ընդունեց Ալեքսանդր Ղազարյանի առաջարկը, ինչը վրդովեցրեց հավաքվածներին, որոնք հայտարարեցին, որ իրենք ոչ մի ՀԿ-ների չեն ենթարկվում եւ իրենց պահանջը չեն փոխի:
«Մենք ՀԿ շոու չենք ուզում, մենք մեր հանապազօրյա հացն ենք ուզում»,- ավելացրեց Արտակ Խաչատրյանը:
Հավաքվածներն այս պահին վանկարկում են «կասեցում, կասեցում»:
Նշենք, որ այսօր՝ հունվարի 26-ին, վաղ առավոտյան կառավարության շենքի մոտ են հավաքվել Երեւանի գրեթե բոլոր տոնավաճառների մի քանի հարյուր աշխատակիցները:
Հիշեցնենք, որ 2014թ. հոկտեմբերի 1-ից ուժի մեջ է մտել «Շրջանառության հարկի մասին» ՀՀ օրենքը, ըստ որի տոնավաճառների աշխատողները իրենց ապրանքաշրջանառության վերաբերյալ փաստաթղթեր պետք է ներկայացնեն հարկային մարմնին։ Նոր փոփոխությամբ՝ առաջին անգամ փաստաթուղթ չներկայացնելու դեպքում ձեռնարկությունը նախազգուշացում է ստանում, երկրորդ անգամ՝ տուգանվում 20 հազար դրամի չափով, երրորդ անգամ՝ շրջանառության հարկի 5 տոկոսի չափով: Կառավարությունը նոր օրենքը հիմնավորում է խոշոր բիզնեսը հարկային դաշտ բերելու անհրաժեշտությամբ։ Տոնավաճառների աշխատողների բողոքներից հետո միայն հոկտեմբերի 6-ին վարչապետ Հովիկ Աբրահամյանը հանձնարարել է մինչեւ 2015թ. փետրվարի 1-ը հետաձգել «Շրջանառության հարկի» մասին օրենքում առկա գույքագրման պահանջը:
Լուսանկարները՝ Արսեն Սարգսյանի/NEWS.am
