Անցած 2014 թվականին հայ-վրացական հարաբերությունները զարգացել եւ ամրապնդվել են` նկատելի առաջընթաց արձանագրելով մի շարք ոլորտներում: Այդ մասին նշվում է ՀՀ ԱԳՆ տարեկան հաշվետվությունում:
Տեղի են ունեցել տարբեր մակարդակների ավելի քան երկու տասնյակ փոխայցելություններ: Փետրվարի 27-28-ը պաշտոնական այցով Հայաստան է ժամանել Վրաստանի նախագահ Գիորգի Մարգվելաշվիլին, իսկ հունիսի 18-19-ը երկօրյա պաշտոնական այցով Վրաստան է այցելել ՀՀ նախագահ Սերժ Սարգսյանը:
Հոկտեմբերի 6-8-ը պաշտոնական այցով Վրաստանում է գտնվել ՀՀ ԱԺ նախագահ Գալուստ Սահակյանի գլխավորած պատվիրակությունը:
Օգոստոսի 21-22-ը կայացել է Վրաստանի վարչապետ Իրակլի Ղարիբաշվիլիի գլխավորած պատվիրակության այցը Հայաստան, իսկ դեկտեմբերի 11-12-ը Վրաստան է այցելել ՀՀ վարչապետ Հովիկ Աբրահամյանի գլխավորած պատվիրակությունը:
Վրացական կողմից տեղի են ունեցել պաշտպանության նախարար Իրակլի Ալասանիայի եւ ներքին գործերի նախարար Ալեքսանդր Չիկաիձեի այցերը: Հունիսի 11-12-ը Երեւանում կայացել են ՀՀ ԱԳՆ-ի եւ Վրաստանի ԱԳՆ-ի միջեւ քաղաքական խորհրդակցությունները:
Դեկտեմբերին Բազելում տեղի է ունեցել Հայաստանի եւ Վրաստանի արտգործնախարարների հանդիպումը։