Թուրքիայում անցկացված սոցհարցման արդյունքներով քաղաքացիների 4-8 տոկոսը Թուրքիայի նախագահ Ռեջեփ Թայիփ Էրդողանից պահանջում է ճանաչել Հայոց ցեղասպանությունը։ Այս մասին այսօր՝ հունվարի 26-ին, լրագրողների հետ զրույցում ասաց թուրքագետ Արտակ Շաքարյանը՝ անդրադառնալով Թուրքիայում երկու շաբաթ առաջ անցկացված հարցման արդյունքներին։
«Հարցվածների մի փոքր տոկոսը՝ 4-8 տոկոսը, պահանջել է, որ Էրդողանը ճանաչի Ցեղասպանությունը։Մի փոքր խորանալով հասկանում ես, որ նրանք քրդական կուսակցությանը ձայն տվողներն են, կամ ավելի ձախ հայացքներ ունեցողները։ Դակայն դա էական չէ, այլ էական է այն, որ 30 տոկոսից ավելին աջակցել են Էրդողանի այն որոշմանը, որ պետք է ցավ հայտնել 1915թ. զոհված հայերի, թուրքերի եւ Օսմանյան կայսրության այլ բնակիչների հիշատակին՝ առանց ցեղասպանություն բառն օգտագործելու եւ առանց թիրախավորված ներողություն խնդրելու»,-ասաց նա։
Թուրքագետի խոսքով՝ Թուրքիայում առաջիկայում խորհրդարանական ընտրություններ են, որտեղ Էրդողանն ամեն ինչ անելու է հաղթելու համար, եւ ընդառաջ կգնա հարցման արդյունքներին եւ հասարակության համար ընդունելի ուղերձ կկարդա։
Թուրքագետը նաեւ նշեց, որ կշարունակվի Ռեջեփ Թայիփ Էրդողանի եւ վարչապետ Դավութօղլուի հայտարությունը ընդհանուր ցավի վերաբերյալ եւ այս տարի եւս ցեղասպանություն բառը չի հնչի։
Թուրքագետը նաեւ քննադատեց Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի գործունեությունը՝ նշելով, որ մինչեւ հիմա դեռ հայտնի չէ, թե ինչ միջոցառումներ են նախատեսվում 100-ամյակի կապակցությամբ։
«Մենք ավելի շատ գիտենք, թե Թուրքիայում ինչ միջոցառումներ են արվելու, քան Հայաստանում։ Հանձնաժողովը խոստացել էր հունվարի հրապարակել միջոցառումների ցանկը, սակայն դեռ ոչինչ չի հայտնել»,-ասաց Արտակ Շաքարյանը։