Հայաստանը 2014թ. քայլեր է ձեռնարկել ԱՊՀ մի շարք երկրների հետ համագործակցությունն ընդլայնելու համար: Այդ մասին նշվում է ՀՀ ԱԳՆ տարեկան հաշվետվությունում:
Բելառուսի Հանրապետության հետ համագործակցության զարգացման ուղղությամբ: Մայիսի 30-ին Մինսկում ԱՊՀ կառավարությունների ղեկավարների խորհրդի նիստերի շրջանակներում կայացել է ՀՀ եւ ԲՀ վարչապետերի հանդիպումը:
Ապրիլի 21-ին կայացել է ՀՀ ԱԳ նախարար Էդվարդ Նալբանդյանի պաշտոնական այցը Բելառուս: Տեղի են ունեցել հանդիպումներ ԲՀ նախագահ Ալեքսանդր Լուկաշենկոյի եւ ԲՀ ԱԳ նախարար Վլադիմիր Մակեյի հետ: Այցի շրջանակներում ստորագրվել են երկու երկրների արտաքին քաղաքական գերատեսչությունների միջեւ 2014-2015 թթ. խորդատվությունների ծրագիրը:
Տարբեր մակարդակներում կայացած հանդիպումների ընթացքում քննարկվել են Հայաստանի եւ Բելառուսի միջեւ քաղաքական երկխոսությանը, առեւտրատնտեսական փոխգործակցությանը, հումանիտար ոլորտում հարաբերությունների խորացմանը, ինչպես նաեւ ՀՀ եւ ԲՀ մարզերի միջեւ համագործակցության ընդլայնմանն առնչվող հարցեր:
Հոկտեմբերի 15-20-ը Հայաստանում անցկացվել են Բելառուսի մշակույթի օրերը, որոնց շրջանակներում ստորագրվել է «Հայաստանի Հանրապետության մշակույթի նախարարության եւ Բելառուսի Հանրապետության մշակույթի նախարարության միջեւ 2014-2017թթ. մշակութային համագործակցության մասին» ծրագիրը:
Զարգացում է ապրել միջխորհրդարանական համագործակցությունը: Սեպտեմբերի 13-ին Երեւանում կայացել է ՀՀ ԱԺ եւ ԲՀ ԱԺ միջեւ միջխորհրդարանական համագործակցության Հանձնաժողովի 8-րդ նիստը:
Ընթացիկ տարում քայլեր են ձեռնարկվել Ուկրաինայի հետ հարաբերությունների զարգացումն ապահովելու ուղղությամբ: Հունիսի 7-ին Ուկրաինայի նորընտիր Նախագահ Պ.Պորոշենկոյի երդմնակալության արարողությանը մասնակցել է ՀՀ պատվիրակությունը` կրթության եւ գիտության նախարար Արմեն Աշոտյանի գլխավորությամբ:
Հայ-ղազախական հարաբերությունները շարունակել են բնականոն զարգացում ապրել: Մայիսի 29-ին Աստանայում ՀՀ Նախագահ Սերժ Սարգսյանը մասնակցել է Եվրասիական տնտեսական բարձրագույն խորհրդի ընդլայնված կազմով նիստին:
Հայ-ղազախական մշակութային հարաբերությունների զարգացման եւ խորացման համար կարեւոր էր հոկտեմբերի 7-9-ը ՂՀ մշակույթի նախարար Ա.Մուխամեդիուլիի այցը Հայաստան, որի ընթացքում ստորագրվել է Հայաստանի Հանրապետության մշակույթի նախարարության եւ Ղազախստանի Հանրապետության մշակույթի եւ սպորտի նախարարության միջեւ 2015-2017թթ. համագործակցության ծրագիրը:
