Հայաստանը ՀԱՊԿ-ին, ինչպես նաեւ միջազգային այլ կազմակերպությունների, այդ թվում՝ ԵԱՀԿ-ին եւ ՄԱԿ-ին տեղյակ է պահում սահմանին Ադրբեջանի սադրանքների մասին, հունվարի 26-ի մամուլի ասուլիսում հայտարարել է ՀՀ արտգործնախարար Էդվարդ Նալբանդյանը:
Ըստ նրա՝ հայկական կողմը մշտապես ՀԱՊԿ-ին տեղեկացնում է սադրանքների մասին, որոնք կարող են ապակայունացնել իրավիճակը եւ սպառնալիք ներկայացնել: Իր կողմից ՀԱՊԿ-ը եւս հաճախ գնահատական է տալիս իրավիճակին: Նախարարը նշել է, որ այս տարի տեղի ունեցած առաջին սադրանքի մասին եւս, որը տեղի էր ունեցել հունվարի 3-ին, կազմակերպությունը տեղեկացվել էր:
Կազմակերպությունն իր դիրքորոշումը արտահայտել է հայտարարությամբ, այդ թվում՝ անցյալ տարվա դեկտեմբերի վերջին գագաթաժողովին: Սակայն պահանջել ՀԱՊԿ-ի արձագանքը ադրբեջանական ամենօրյա խախտումների վերաբերյալ, կնշանակի վարկաբեկել կազմակերպության կարծիքը:
Նախարարն ընդգծել է, որ անհրաժեշտ է իրական գնահատել իրավիճակը եւ գործողությունները: Այդ կապակցությամբ Նալբանդյանը նշել է բանակցությունների առաջընթացի համար պայմանները պահպանելու անհրաժեշտությունը: «Պատահական չէ, որ ԱՄՆ-ն եւ Ֆրանսիան, նախկինում նաեւ՝ Ռուսաստանը, գագաթաժողովներ են կազմակերպել, որոնց ընթացքում ամեն ինչ մանրամասն քննարկվել է», - նշել է նախարարը՝ հավելելով, որ այդ ժամանակ Ադրբեջանի նախագահը հայտարարել էր խաղաղ ճանապարհով հակամարտությունը կարգավորելու մասին: «Սակայն Ալիեւը կարճ հիշողություն ունի. Բաքու վերադառնալուն պես նա մոռանում է իր ասածը», - նշել է Նալբանդյանը:
