Գյումրիում Ավետիսյանների սպանության մեջ մեղադրվող` ռուսական 102-րդ ռազմաբազայի ժամկետային զինծառայող Վալերի Պերմյակովին` Հայաստանի ոստիկանության կողմից հայտնաբերելու եւ այնուհետեւ ռուս սահմանապահին հանձնելու մասին տեղեկություններն իրականությանը չեն համապատասխանում: Այս մասին այսօր` հունվարի 26-ին, լրագրողների հետ զրույցում ասաց ոստիկանության պետի առաջին տեղակալ, ոստիկանության գեներալ-լեյտենանտ Հունան Պողոսյանը:
Նրա խոսքով` Պերմյակովին հայտնաբերել են հենց ռուս սահմանապահները:
«Պետք չէ թյուր կարծիք կազմել, որ ոստիկանությունը լավ չի աշխատել: Մենք համագործակցել ենք ազգային անվտանգության ծառայության, Քննչական կոմիտեի աշխատակիցների հետ: Այդ օրը դեպքից անմիջապես հետո մենք բազմաթիվ նմանատիպ ահազանգեր ենք ստացել, թե որտեղ կարող է լինել Պերմյակովը: Ահազանգեր կային եւ Արագածոտնի, եւ Արմավիրի մարզերից, եւ Երեւանից: Մենք բոլոր ահազանգերի հետեւից գնացել ենք: Այդպիսի մի ահազանգ էլ եղել էր հայ-թուրքական սահմանից: Մենք մանրակրկիտ ուսումնասիրել էինք տարածքը»,- ասաց Հունան Պողոսյանը` ավելացնելով, որ հայկական կողմի համար գերխնդիր չի եղել, թե ով կբռնի ռուս զինծառայողին:
Նշենք, որ ավելի վաղ լրագրողների հետ զրույցում Հայաստանի ոստիկանապետ Վլադիմիր Գասպարյանը հայտարարել էր, որ Պերմյակովին հայտնաբերելուց երկու ժամ առաջ իրենք արդեն տեղեկություն ունեին, թե ամենայն հավանականությամբ, որտեղ է գտնվում Պերմյակովը:
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դստերը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել էր հիվանդանոց, սակայն դեպքից 7 օր անց հիվանդանոցում մահացել էր նաեւ նա:
Այս գործով նույն օրը, կեսգիշերին մոտ ձերբակալվել է ռուս զինվորական Վալերի Պավելի Պերմյակովը, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել եւ մեղադրանք են առաջադրել ՌԴ Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Հունվարի 21-ին Պերմյակովին մեղադրանք են առաջադրել նաեւ հայ քննիչները՝ ՀՀ Քրեական օրենսգրքի 104-րդ հոդվածի 2-րդ մասի 1-ին կետով՝ երկու եւ ավելի անձանց դիտավորյալ սպանության համար: Ռուս զինծառայողն ընդունել է առաջադրված մեղադրանքը: