Ադրբեջանի իշխանություններն իրենց երկիրը տարել են փակուղի եւ այժմ հիստերիայով փորձում են դուրս պրծնել: Այս մասին հունվարի 26-ի մամուլի ասուլիսում հայտարարել է ՀՀ արտգործնախարար Էդվարդ Նալբանդյանը:
Ըստ նախարարի՝ ինչքան Ադրբեջանում ավելանում են հետապնդումները եւ ընդդիմության եւ քաղաքացիական հասարակության դեմ ճնշումները, ինչն ուղեկցվում է միջազգային հանրության կողմից դատապարտմամբ, այնքան այդ երկրի իշխանությունները փորձում են ուշադրությունը շեղել այդ հարցերից եւ սրել իրավիճակը սահմանին:
«Փորձերը շարունակվում են, չնայած որ Ադրբեջանի կորուստներն ավելի շատ են: Սակայն Ադրբեջանի իշխանությունների համար, ամենայն հավանականությամբ, մարդկանց զոհվելը հատուկ նշանակություն չունի: Իշխանությունները ողջ մարդկանց ընկալում են որպես համակարգչային խաղի վիրտուալ զինվորիկներ՝ նրանց մահվան ուղարկելով», - նշել է Էդվարդ Նալբանդյանը: Ըստ նրա՝ ասվածը չի նշանակում, որ պետք է դադարեցնել ջանքերը: «Սակայն գնալով ավելի շատ հարցեր են ծագում Ադրբեջանի իշխանությունների ադեկվատության եւ իրավիճակն ադեկվատ գնահատելու նրանց ունակության վերաբերյալ», - նշել է նախարարը՝ մեջբերելով Իլհամ Ալիեւի վերջերս արված հայտարարությունը Ադրբեջանում մամուլի ազատության եւ բնակչության 90%-ի կողմից իր անձի աջակցության վերաբերյալ: