Դերասան Վարդան Պետրոսյանը հնարավորություն է ունեցել դատավարությունը ավելի շուտ եւ իր արդարացման վճիռով ավարտելու, սակայն հրաժարվել է դրանից։ Այս մասին այսօր՝ հունվարի 26-ին, Կոտայքի մարզի ընդհանուր իրավասության դատարանում իր ռեպլիկում ասաց դերասանի փաստաբան Նիկոլայ Բաղդասարյանը։
Փաստաբանի խոսքով՝ եթե նշանակվեր դատաավտոտեխնիկական փորձաքննություն, այն կապացուցեր, որ վթարը տեղի է ունեցել ճանապարհի բանուկ մասում, ոչ թե կողնակում։
«Եթե ես ապացուցեի, որ բանուկ մասում է եղել, գործն ավարտվում էր, Վարդանը ազատ էր արձակվում»,- ասաց փաստաբանը։
Նրա խոսքով՝ Վարդան Պետրոսյանն ինքն է հրաժարվել այդ հնարավորությունից, քանի որ այդ դեպքում վթարի պատասխանատվությունը կընկներ Արթուր Հակոբյանի վրա. «Նա ասաց՝ միայն մի պայմանով, եթե Արթուր Հակոբյանը բացարձակապես անմեղ ճանաչվի եւ որեւէ պատասխանատվություն չկրի, մենք էլ փոխահատուցենք գումարը»։
Նշենք, որ դատախազ Արթուր Սարգսյանը պահանջել է դերասանին ենթարկել 6 տարի 6 ամիս տարվա ազատազրկման՝ 3 տարով զրկելով մեքենա վարելու իրավունքից:
Հիշեցնենք, որ ըստ մեղադրական եզրակացության՝ Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում, Կոտայքի մարզի Սարալանջ գյուղի կողմից դեպի Երեւան ուղղությամբ վարելիս «ԲՄՎ-320» մակնիշի մեքենայով բախվել է «Վազ 21214» մակնիշի մեքենայի հետնամասին։ Վթարի հետեւանքով «Վազ-21214» մակնիշի մեքենայի ուղեւորներ Էդվարդ եւ Էդգար Հակոբյանները մահացել են, ուղեւորներ Տաթեւիկ Հակոբյանը, Հայկ Հակոբյանը, էմմա Հակոբյանը, ինչպես նաեւ վարորդ Արթուր Հակոբյանն ստացել են վնասվածքներ: Վարդան Պետրոսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասի հատկանիշներով՝ «Ճանապարհային երթեւեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ»։ Տուժող կողմը փորձում է ապացուցել, որ Վարդան Պետրոսյանը վթարի պահին եղել է ալկոհոլի ազդեցության տակ եւ գերազանցել է թույլատրելի արագությունը։ Դերասանը հերքում է այդ վարկածը եւ իրեն հերթին փորձում է ապացուցել, որ տուժող կողմի մեքենան կայանած է եղել ոչ թե ճանապարհի կողնակին, այլ երթեւեկելի գոտում, ունեցել է անսարքություններ։