Հայաստանի արտգործնախարարության պասիվությունը ադրբեջանցիներին թույլ է տալիս խախտել հրադադարը։ Այս մասին այսօր՝ հունվարի 26-ին, լրագրողների հետ հանդիպմանը հայտարարեց ազգագրագետ Հրանուշ Խառատյանը՝ անդրադառնալով սահմանին վերջին օրերի լարվածության եւ ադրբեջանական դիվերսիոն գործողություններից հետո ԱԳՆ լռությանը։
«Նրա ծրագրավորված գործողությունների մեջ է՝ լինել պասիվ, կրավորական, չունենալ կամ չարտահայտել դիրքորոշում։ Այս պասիվությունը եւ կրավորականությունը լրացուցիչ բարդություն են ռազմական գործողությունների համար եւ նպաստում են սահմանին լարվածության ակտիվացմանը»,- ասաց Հրանուշ Խառատյանը։
Ազգագրագետի կարծիքով՝ Հայաստանը դիվանագիտություն առհասարակ չունի։ «Հայաստանը չունի ձեւակերպված դիվանագիտական ծրագիր։ Հայաստանի ԱԳՆ-ն իր բանաձեւած դիրքորոշումների մասին չի տեղեկացնում Հայաստանի ներքին լսարանին եւ արտաքին աշխարհին։ Հայաստանում դիվանագիտություն գոյություն չունի, կամ եթե գոյություն ունի, դա Հայաստանի արտգործնախարարի ռուսական կցորդ լինելու հանգամանքն է, որը Հայաստանի արտաքին քաղաքականության տապալումն է»,- նշեց նա։
ՀՀԿ պատգամավոր Արտակ Դավթյանը, սակայն, չի կիսում ազգագրագետի կարծիքը եւ համոզված է, որ Հայաստանի ԱԳՆ-ն այս տարիների ընթացքում որեւէ սխալ քայլ չի կատարել։
«Քայլերի զգուշությունը երկչոտության տպավորություն է ստեղծում, բայց պետք է ասեմ, որ ներկա եւ նախկին արտգործնախարարները որեւէ սխալ այս տարիների ընթացքում թույլ չեն տվել»,- ասաց պատգամավորը։