Գյումրեցի Ավետիսյանների ընտանիքի սպանության մեջ մեղադրվող Վալերի Պերմյակովին ՀՀ իրավապահ մարմիններին հանձնելու պահանջով այսօր՝ հունվարի 26-ին, Թամանյանի արձանի մոտից մեկնարկեց մի քանի տասնյակ քաղաքացիների պահանջի երթը դեպի Ազատության հրապարակ: (ֆոտոռեպորտաժ)
Պահանջի երթի մասնակիցներն իրենց հետ բերել են «Սուգը հավերժ է, եթե չկա պայքար», «Գյումրի, դու մենակ չես», «Մեր պահանջն արդար է» գրությամբ պաստառներ:
«Մենք ՀՀ իշխանություններից պահանջում ենք անհապաղ միջոցներ գործադրել Գյումրիում տեղի ունեցած ոճրագործության մեղադրյալին ՀՀ արդարադատությանը հանձնելու համար: ՌԴ իշխանությանը կոչ ենք անում իրականացնել ՀՀ-ի հետ կնքված միջազգային պայմանագրի նորմերը: Ցանկանում ենք, որ ժողովրդի մոտ եղած հիասթափությունը փոխվի, մարդիկ ոչ միայն սգան, այլեւ պայքարեն անարդարությունների դեմ»,- լրագրողների հետ զրույցում ասաց երթի կազմակերպիչներից Նարեկ Այվազյանը:
NEWS.am-ի թղթակիցը հաղորդում է, որ երթին մասնակցում են ինչպես երիտասարդ, այնպես էլ տարեց քաղաքացիներ Գյումրիից եւ Երեւանից: Երթին մասնակցում է նաեւ իրավապաշտպան Արթուր Սաքունցը։
Ոստիկանների ուղեկցությամբ նրանք շարժվում են Կորյուն փողոցով դեպի Աբովյան փողոց, այնուհետեւ Թումանյան փողոց, եւ եւ երթը կավարտեն Ազատության հրապարակում:
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դստերը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել է հիվանդանոց, սակայն դեպքից 7 օր անց հիվանդանոցում մահացել է նաեւ նա:
Այս գործով նույն օրը, կեսգիշերին մոտ ձերբակալվել է ռուս զինվորական Վալերի Պավելի Պերմյակովը, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել եւ մեղադրանք են առաջադրել ՌԴ Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Հունվարի 21-ին Պերմյակովին մեղադրանք են առաջադրել նաեւ հայ քննիչները՝ ՀՀ Քրեական օրենսգրքի 104-րդ հոդվածի 2-րդ մասի 1-ին կետով՝ երկու եւ ավելի անձանց դիտավորյալ սպանության համար: Ռուս զինծառայողն ընդունել է առաջադրված մեղադրանքը:
Լուսանկարները՝ Արսեն Սարգսյանի /NEWS.am
