Գյումրեցի Ավետիսյանների ընտանիքի սպանության մեջ մեղադրվող Վալերի Պերմյակովին ՀՀ իրավապահ մարմիններին հանձնելու պահանջով երթերը շարունակական են լինելու։ Այս մասին այսօր՝ հունվարի 26-ին, հայտարարեցին Երեւանում անցկացված երթի կազմակերպիչները։ (ֆոտոռեպորտաժ)
«Մեր միջոցառումներն այսքանով չեն սահմանափակվի, տեղի կունենան միջոցառումներ, որոնց մասին կտեղեկացնենք։ Չենք կարծում, որ այս մի երթով ՀՀ կամ ՌԴ իշխանությունները կատարելու են մեր պահանջը։ Այս պահանջով ՀՀ քաղաքացիների միանալն ակցիային ազդեցություն կունենա, որպեսզի խնդիրը լուծում ստանա»,- ասաց երթի նախաձեռնողներից Նարեկ Այվազյանը։
Երթի մասնակիցները «պահանջում ենք», «միացում» վանկարկումներով քայլեցին Կորյուն, Աբովյան, Թումանյան փողոցներով՝ երթն ավարտելով Ազատության հրապարակում։
Նշենք, որ ակցիայի մասնակիցները հունվարի 29-ին Ազատության հրապարակում այս թեմայով հանրային քննարկում կանցկացնեն։
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դստերը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել է հիվանդանոց, սակայն դեպքից 7 օր անց հիվանդանոցում մահացել է նաեւ նա:
Այս գործով նույն օրը, կեսգիշերին մոտ ձերբակալվել է ռուս զինվորական Վալերի Պավելի Պերմյակովը, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել եւ մեղադրանք են առաջադրել ՌԴ Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Հունվարի 21-ին Պերմյակովին մեղադրանք են առաջադրել նաեւ հայ քննիչները՝ ՀՀ Քրեական օրենսգրքի 104-րդ հոդվածի 2-րդ մասի 1-ին կետով՝ երկու եւ ավելի անձանց դիտավորյալ սպանության համար: Ռուս զինծառայողն ընդունել է առաջադրված մեղադրանքը:
