Երեւանում, այսօր՝ հունվարի 26-ին, Հայաստանում Հնդկաստանի դեսպանատանը ընդունելություն է կազմակերպվել՝ նվիրված ազգային տոնին՝ Հանրապետության օրվան:
Միջոցառմանը ներկա են եղել Հայաստանի ԱԳՆ ներկայացուցիչներ, դեսպաններ, ՀՀ-ում հավատարմագրված դիվանագիտական առաքելությունների ներկայացուցիչներ,կառավարության անդամներ, միջազգային կազմակերպությունների ներկայացուցիչներ:
Իր ողջույնի խոսքում ՀՀ-ում Հնդկաստանի դեսպան Սուրեշ Բաբուն նշեց, որ դեսպանատունը շատ միջոցառումներ է կազմակերպում, որոնց հիմնական առաքելությունը հայերի ու հնդիկների միջեւ շփումների հաստատումն է:
Իր հերթին, ԿԳ նախարար Արմեն Աշոտյանը ընդգծեց, որ Հնդկաստանը ոչ միայն հարուստ մշակույթ ունեցող երկիր է, այլեւ տնտեսության ոլորտում մեծ առաջընթաց արձանագրող պետություն: «Ժամանակակից Հնդկաստանը բարձր տեխնոլոգիաների եւ ջերմ սրտեր ունեցող մարդկանց երկիր է»,-ասաց նա:
Միջոցառման ընթացքում մրցանականեր են հանձնվել հայ դպրոցականների շրջանում «Հնդկաստանն իմ պատկերացմամբ» թեմայով կազմակերպված էսսեյի մրցույթի հաղթողներին: Մրցույթին, որը կազմակերպել է Հայաստանի ԿԳՆ-ն եւ Թումո կենտրոնը, մասնակցել է ավելի քան 1500 աշակերտ:
