Ռուսաստանը իր շահերն է պաշտպանում տարածաշրջանում եւ չի հանդիսանում մեր երկրի անվտանգության երաշխիքը։ Այսօր՝ հունվարի 27-ին, լրագրողների հետ զրույցում կարծիք հայտնեց «Տիգրան Մեծ» աշխարհազորային գնդի ռազմական խորհրդի փոխնախագահ Վլադիմիր Առաքելյանը։
«Ես համոզված չեմ, որ Ռուսաստանը մեր ապահովության գարանտն է, ինչպես պատմությունն է ցույց տալիս, նրանք մի օր կամ մի ժամ կարող են ուշանալ, եւ դա կարող է ճակատագրական լինել»,- ասաց Վլադիմիր Առաքելյանը։
Նրա խոսքով՝ Ռուսաստանը Հայաստանին նույնիսկ վասալի տեղ չի դնում. «Չի կարող քեզ համար անվտանգության երաշխիք լինել մի պետություն, որը 4 միլիարդի զենք է վաճառում քո թշնամուն, եւ այս առումով մենք կարող ենք հայտնվել լուսանցքում եւ շատ արագ զոհ դառնալ ռուսական շահին»։
Շուշիի առանձնակի գումարտակի փոխհրամանատար Մկրտիչ Մկրտչյանի կարծիքով էլ՝ եթե ռուսական զորքը չլիներ Արցախյան ազատամարտի ժամանակ, որոնք օգնում էին ադրբեջանցիներին, հայերը վաղուց Բաքուն գրաված կլինեին։
«Եթե ռուսական զորքը չլիներ, ապա այսօր Բաքուն մերը կլիներ, Շահումյանը, Գետաշենը, Մարտունաշենը չէիքն հանձնի, եւ ընդհանրապես, ադրբեջանցիները միայն հաջողություն են ունեցել այն ժամանակ, երբ նրանց օգնել է ռուսական զորքը, մնացած դեպքերում իրենք միշտ պարտվել են»։
Ազատամարտիկների խոսքով՝ Արցախյան ազատամարտում մեր հաղթանակի պատճառն այն էր, որ մեր նպատակը ոչ թե հող զավթելն էր, այլ հող պահելը։
«Եթե մենք ժամանակին փոքրաթիվ խմբերով կարողանում էինք ութ միլիոնանոց ազգին չոքացնել, ապա հիմա, ազերին ո՞վ ա, երբ կանոնավոր բանակ ունենք»,-ասաց Վլադիմիր Առաքելյանը։
Ազատամարտիկները համոզված են, որ մեր բանակն այսօր էլ «իր թերություններով հանդերձ» բավական հզոր է եւ ամեն պահի կարող է թշնամուն արժանի պատասխան տալ։