Ժնեւում ընթացող բանակցություններն արդեն հասել են փորձագիտական մակարդակի, որտեղ մենք քննարկել ենք ընդհանուր խնդիրներ, այսինքն Իրանի կողմից ուրանի հարստացման ծրագիրը հասկանալի է, միջուկային ծրագիրը կշարունակվի: Այս մասին, այսօր՝ հունվարի 27-ին, Երեւանում, ՀՀ ԱԳ նախարար Էդվարդ Նալբանդյանի հետ համատեղ ասուլիսում հայտարարել է Իրանի Ագ նախարար Մոհամադ Ջավադ Զարիֆը:
Նրա խոսքով՝ Իրանը հենց սկզբից ասել է, որ միջուկային զենք ստեղծելու նպատակ չունի: «Հետեւաբար, մենք չենք անհանգստանում միջազգային հանրության կողմից անհրաժեշտ վստահության հարցում: Քիչ երկրներ են մնացել, որոնց մոտ պահպանվում է անհանգստությունը: Մենք պատրաստ ենք համագործակցել այդ երկրների հետ»,-ասել է Զարիֆը:
Իրանի ԱԳ նախարարը նշել է, որ բանակցություններում հիմնական սկզբունքների շուրջ տարաձայնություններ չկան: «Կան խնդիրներ դետալներում, որոնք անհրաժեշտ են հստակեցնել՝ համաձայնության հասնելու համար: Դրա վերաբերյալ արդյունավետ բանակցություններ են անցկացվել: Իհարկե, դեռ կան լուրջ խնդիրներ, բայց հույս ունենք, որ քաղաքական կամքի եւ իրատեսության շնորհիվ դրանք լուծում կստանան»,-ընդգծել է Զարիֆը: