Թուրքիայի մարդու իրավունքների միությունը ՄԻԵԴ-ում հունվարի 28-ին տեղի ունենալիք «Փերինչեքն ընդդեմ Շվեյցարիայի» դատին հանդես կգա Փերինչեքի դեմ։
Թուրքական Demokrathaber կայքի փոխանցմամբ՝ Թուրքիայի մարդու իրավունքների միությունը (IHD) եւ «Իրական արդարության եւ հիշողության կենտրոնի» հետ միասին «Փերինչեքն ընդդեմ Շվեյցարիայի» դատին կողմ լինելու համար դիմել են ՄԻԵԴ։
Միեւնույն ժամանակ Թուրքիայից հիշյալ երկու կազմակերպությունները միջազգային «Ցեղասպանության եւ մարդու իրավունքների աշխատանքների ինստիտուտի» հետ համատեղ պատրաստած տեսակետ են ներկայացրել ՄԻԵԴ։
Թուրքիայի մարդու իրավունքների միության փոխնախագահ Մերալ Չըլդըրը նշել է, որ իրենք Փերինչեքի գործով դատին կողմ լինելու համար դիմել են ՄԻԵԴ եւ իրենց դիմումն ընդունվել է։
Թուրքիայի մարդու իրավունքների միության փաստաբաններին Էրեն Քեսքինն էլ նշել է, որ իրենց կողմից ՄԻԵԴ ներկայացված զեկույցում շեշտվել է, որ Փերինչեքի հայտարարությունները խտրական նշանակություն ունեն եւ հանցանքն են համարվում։ Ըստ փաստաբանի՝ Փերինչեքը խախտել է նաեւ Մարդու իրավունքների եվրոպական համաձայնագրի 10-րդ կետի 2-րդ ենթակետը՝ ժողովրդավարական հասարակություններում աղետի ենթարկվածների հարազատների զգացմունքները պահպանելը»։
Նշենք, որ 2008 թվականին Շվեյցարիայի դատարաններից մեկը Հայոց ցեղասպանությունը ժխտելու համար դատապարտել էր Թուրքիայի Աշխատավորական կուսակցության առաջնորդ Դողու Փերինչեքին։
Փերինչեքը դիմել էր ՄԻԵԴ եւ նախորդ տարի դեկտեմբերին ՄԻԵԴ-ը բավարարել է Փերինչեքի հայցն ընդդեմ Շվեյցարիայի։
Շվեյցարիան բողոքարկել է ՄԻԵԴ-ի որոշումը, որից հետո Հայաստանը դիմել է ՄԻԵԴ եւ հանդես է գալիս որպես 3-րդ կողմ։ Հայաստանի շահերը ներկայացնելու է փատաբանների հայտնի խումբ` Ջեֆրի Ռոբերթսոնի եւ Ամալ Ռամզի Քլունիի մասնակցությամբ։