Եվրասիական տնտեսական միությանը Հայաստանի անդամակցությունը կնպաստի հայ-իրանական տնտեսական կապերի աշխուժացմանը: Այս մասին, այսօր՝ հունվարի 27-ին, ՀՀ վարչապետ Հովիկ Աբրահամյանի հետ հանդիպման ժամանակ նշել է Իրանի արտաքին գործերի նախարար Մոհամադ Ջավադ Զարիֆին:
Ողջունելով հյուրին՝ վարչապետը բարձր է գնահատել հայ-իրանական բարեկամական հարաբերությունները եւ կարեւորել դրանց շարունակական խորացումը: ԻԻՀ արտաքին գործերի նախարարը ՀՀ վարչապետին է փոխանցել ԻԻՀ առաջին փոխնախագահ Էսհաղ Ջահանգիրիի ջերմ ողջույնները եւ նշել, որ ՀՀ վարչապետի՝ 2014 թ. հոկտեմբերին ԻԻՀ կատարած պաշտոնական այցը նպաստել է երկու երկրների հարաբերությունների խորացմանը եւ ամրապնդմանը: Պարոն Զարիֆի խոսքով՝ Հովիկ Աբրահամյանն ինչպես Ազգային ժողովի նախագահի, այնպես էլ վարչապետի պաշտոնում նշանակալի ներդրում ունի հայ-իրանական կապերի սերտացման եւ ընդլայնման գործում:
Զրուցակիցները գոհունակություն են հայտնել Հայաստանի եւ Իրանի միջեւ քաղաքական երկխոսության բարձր մակարդակից եւ ընդգծել, որ պետք է ջանքեր գործադրել առեւտրատնտեսական համագործակցությունը եւս այդ մակարդակին հասցնելու ուղղությամբ:
Հովիկ Աբրահամյանը եւ Մոհամադ Ջավադ Զարիֆը քննարկել են հայ-իրանական համագործակցությանը վերաբերող հարցերի լայն շրջանակ: Մասնավորապես, անդրադարձ է եղել տարբեր ոլորտներում ինչպես ընթացիկ, այնպես էլ հեռանկարային ծրագրերին, որոնք կնպաստեն առեւտրատնտեսական հարաբերությունների զարգացմանը: Այս համատեքստում կողմերն առանձնակի կարեւորել են ՀՀ եւ ԻԻՀ միջկառավարական համատեղ հանձնաժողովի գործունեությունը, գոհունակություն հայտնել հանձնաժողովի վերջին՝ 2014 թ. դեկտեմբերին Իրանում կայացած նիստի աշխատանքներից եւ շեշտել, որ դրա արդյունքում ձեռք բերված պայմանավորվածությունները կյանքի կկոչվեն` ի շահ երկու երկրների եւ ժողովուրդների:
Անդրադառնալով Եվրասիական տնտեսական միությանը Հայաստանի անդամակցությանը՝ Իրանի արտաքին գործերի նախարարը նշել է, որ այն եւս կնպաստի հայ-իրանական տնտեսական կապերի աշխուժացմանը:
Հանդիպման ընթացքում անդրադարձ է եղել նաեւ տարածաշրջանային իրավիճակին եւ զարգացումներին, կարեւորվել հակամարտությունների խաղաղ կարգավորումը եւ տարածաշրջանի կայունությունը: