Թուրքիայի «Աշխատավորական» կուսակցության առաջնորդ, երդվյալ հակահայ Դողու Փերինչեքը ՄԻԵԴ-ի դատին մեկնելուց առաջ պարզաբանել է, որ «Փերինչեքն ընդդեմ Շվեյցարիայի» դատը Հայոց ցեղասպանության դատը չէ։
Թուրքական Canlihaber կայքի փոխանցմամբ՝ «Աշխատավորական» կուսակցության նախագահ Դողու Փերինչեքը Ստրասբուրգ մեկնելու համար մոտ 200 հոգանոց խմբով է ժամանել Ստամբուլի օդանավակայան։
Օդանավակայանում կարճ ասուլիս կազմակերպած Փերինչեքը նշել է, թե տեղի ունենալիք դատը Հայոց ցեղասպանության դատը չէ։ Ըստ Փերինչեքի՝ այն դատ է խտրականության ենթարկվելու եւ հետեւից խփվելու հետ կապված։
«ՄԻԵԴ-ը շատ համարձակ վճիռ է կայացրել 2013-ի դեկտեմբերի 17-ին։ Հիմա էլ նույն որոշումը սպասում ենք ՄԻԵԴ-ի գերագույն պալատից։ Դրա համար էլ Ստրասբուրգ ենք գնում։ Վստահում ենք, քանի որ ճիշտ ենք»,-ասել է Փերինչեքը։
Նշենք, որ 2008 թվականին Շվեյցարիայի դատարաններից մեկը Հայոց ցեղասպանությունը ժխտելու համար դատապարտել էր Թուրքիայի Աշխատավորական կուսակցության առաջնորդ Դողու Փերինչեքին։
Փերինչեքը դիմել էր ՄԻԵԴ եւ նախորդ տարի դեկտեմբերին ՄԻԵԴ-ը բավարարել է Փերինչեքի հայցն ընդդեմ Շվեյցարիայի։
Շվեյցարիան բողոքարկել է ՄԻԵԴ-ի որոշումը, որից հետո Հայաստանը դիմել է ՄԻԵԴ եւ հանդես է գալիս որպես 3-րդ կողմ։ Հայաստանի շահերը ներկայացնելու է փատաբանների հայտնի խումբ` Ջեֆրի Ռոբերթսոնի եւ Ամալ Ռամզի Քլունիի մասնակցությամբ։