Կալիֆորնիական Փասադենա քաղաքում կայացել է Հայոց ցեղասպանության զոհերի հուշարձանի հիմնարկեքի արարողությունը: Այս մասին գրում է տեղական «The Pasadena Star-News» պարբերականը:
Հիշատակի զբոսայգու շինհրապարակում կայացած արարողությանը մասնակցել են նախագծի դիզայները՝ Դիզայնի քոլեջի շրջանավարտ Քեթրին Մենարը, Փասադենայի Հայոց ցեղասպանության զոհերի հուշարձանի հանձնաժողովի անդամներ, քաղաքային պաշտոնյաներ, տեղի հայկական եկեղեցիների եւ դպրոցների ներկայացուցիչներ:
Քեթրին Մենարը նշել է, որ ուրախ է տեսնել, թե ինչպես է իր նախագիծը սկսում կյանքի կոչվել: Դիզայները նախագիծը ներկայացրել է 2013 թվականի ապրիլին, այն բանից հետո, երբ հանձնաժողովն այն ընտրել է ներկայացված 16 այլ նախագծերից:
Հուշարձանը 5 մետր բարձրությամբ եռոտանու տեսք է ունենալու՝ շրջապատված շուրջ 8 մետր բարձրությամբ քարե սյուների օղակով, ավազան թափվող ջրի կաթիլներով, որոնք խորհրդանշելու են 1915-1923 թվականների Ցեղասպանության ժամանակ օսմանցի թուրքերի կողմից սպանված 1.5 մլն հայերից յուրաքանչյուրին: Շողացող կաթիլներն ավազան են թափվելու յուրաքանչյուր 21 վայրկյանը մեկ, այնպես որ՝ տարեկան 1.5 մլն կաթիլ է թափվելու:
Եռոտանին հիշեցնում է այն սարքավորումները, որոնց վրա Հայոց ցեղասպանության ժամանակ կախաղան են բարձրացրել հայկական առաջնորդներին: Եռոտանու եւ քարերի շուրջ 12 նռենի է լինելու, որոնք մարմնավորելու են Հայաստանի 12 կորսված գավառները:
Հուշարձանի բացման արարողությունը նախանշված է ապրիլի 18-ին՝ Հայոց ցեղասպանության 100-րդ տարելիցի նախաշեմին: