ՄԻԵԴ-ում հունվարի 28-ին տեղի ունենալիք «Փերինչեքն ընդդեմ Շվեյցարիայի» դատական նիստի ժամանակ Թուրքիայի «Աշխատավորական» կուսակցության առաջնորդ Դողու Փերինչեքի պաշտպանական ճառի գլխավոր դրույթը լինելու է խոսքի ազատության մասին օրենքները վկայակոչելը։
Թուրքական Aktifmedya կայքի փոխանցմամբ՝ Դողու Փերինչեքը ՄԻԵԴ-ի Գերագույն պալատում տեղի ունենալիք դատական նիստում պաշտպանական ճառը կկարդա թուրքերենով, որը կտեւի 10 րոպե։
Դողու Փերինչեքի պաշտպանական ճառի գլխավոր դրույթը լինելու է խոսքի ազատության մասին օրենքները վկայակոչելը։ «Խոսքի ազատությունը կամ բոլորի համար է, կամ ոչ մեկի»,-ասելու է Փերինչեքը ըստ թուրքական լրատվամիջոցի։
Նշենք, որ 2008 թվականին Շվեյցարիայի դատարաններից մեկը Հայոց ցեղասպանությունը ժխտելու համար դատապարտել էր Թուրքիայի Աշխատավորական կուսակցության առաջնորդ Դողու Փերինչեքին։
Փերինչեքը դիմել էր ՄԻԵԴ եւ նախորդ տարի դեկտեմբերին ՄԻԵԴ-ը բավարարել է Փերինչեքի հայցն ընդդեմ Շվեյցարիայի։
Շվեյցարիան բողոքարկել է ՄԻԵԴ-ի որոշումը, որից հետո Հայաստանը դիմել է ՄԻԵԴ եւ հանդես է գալիս որպես 3-րդ կողմ։ Հայաստանի շահերը ներկայացնելու է փատաբանների հայտնի խումբ` Ջեֆրի Ռոբերթսոնի եւ Ամալ Ռամզի Քլունիի մասնակցությամբ։
Դատին Հայաստանի կողմից է մասնակցելու նաեւ Թուրքիայի մարդու իրավունքների միությունը, որն արդեն իր տեսակետն է հանձնել ՄԻԵԴ։
