Հայկական պատվիրակության անդամները ձգտեցին Եվրախորհրդի Խորհրդարանական վեհաժողովի (ԵԽԽՎ) պատվիրակների ուշադրությունը հրավիրել այն հանգամանքի ուղղությամբ, որ Ադրբեջանը ներում շնորհեց եւ հերոսացրեց մարդասպան Ռամիլ Սաֆարովին: Այս մասին NEWS.am-ի թղթակցի հետ զրույցում հայտարարեց Հայաստանի Ազգային ժողովի փոխնախագահ, ԵԽԽՎ-ում հայկական պատվիրակության ղեկավար Հերմինե Նաղդալյանը:
Նրա խոսքով, ինքն ու պատվիրակության անդամ Արփինե Հովհաննիսյանը ելույթ են ունեցել ԵԽԽՎ Բյուրոյի զեկույցի առնչությամբ, որը ներկայացրել է բրիտանացի խորհրդարանական Քրիստոֆեր Չոպը: «Մենք անդրադարձանք նախորդ նստաշրջանից հետո տեղի ունեցած իրադարձություններին: Առաջին հերթին այն առնչությամբ, որ Եվրախորհուրդը նույն Չոպի զեկույցի հիման վրա բանաձեւ է ընդունել՝ կապված դատապարտված անձանց փոխանցման մասին Կոնվենցիայի հետ: Հարցը վերաբերում է Հունգարիայի կողմից մարդասպան Ռամիլ Սաֆարովի արտահանձնմանը, որը հետագայում Ադրբեջանում արդարացվեց եւ հերոսացվեց»,- նշեց Հերմինե Նաղդալյանը:
Խորհրդարանականը նաեւ հավելեց, որ հայ պատվիրակներն ընդգծել են այդ զեկույցի կարեւորությունը: «Զեկույցի խնդիրն էր նաեւ, որպեսզի Եվրախորհուրդը եւս մեկ անգամ հարց բարձրացնի այն մասին, որ կոնվենցիաները պետք է կատարվեն իրենց բովանդակության համապատասխան, այլ ոչ թե դիտարկվեն որպես դրանց հիմնական նպատակներից շեղվելու հնարավորություն»,- ընդգծեց ԵԽԽՎ-ում Հայաստանի պատվիրակության ղեկավարը:
Հիշեցնենք, որ վերոնշյալ բանաձեւի նախագիծն ընդունվել է 2014 թվականի մայիսին, ԵԽԽՎ իրավական եւ մարդու իրավունքների հարցերի հանձնաժողովի կողմից: Բանաձեւում, որը նեւ բրիտանացի խորհրդարանական Քրիստոֆեր Չոպի զեկույցի հիմք է հանդիսացել, մտահոգություն է արտահայտվում այն փաստի առիթով, որ եվրոպական Կոնվենցիան օգտագործվել է՝ Ադրբեջանին արտահանձնելուց անմիջապես հետո մարդասպան Ռամիլ Սաֆարովին արդարացնելու եւ անհապաղ ազատ արձակելու համար:
Փաստաթղթի համաձայն, հայրենիք վերադառնալուց հետո Սաֆարովին որպես ազգային հերոս ընդունեցին, հունգարական դատարանի կողմից սահմանված պատժաչափի ժամկետը լրանալուց չափազանց վաղ ներում շնորհեցին եւ տարբեր պարգեւների արժանացրին: Բանաձեւի նախագծում նշվում էր, որ Կոնվենցիան նախատեսված չէ հայրենիք վերադառնալուց հետո ազատազրկման դատապարտված անձանց անմիջապես ազատ արձակելու համար:
Հայ սպա Գուրգեն Մարգարյանին դաժանորեն սպանած Ռամիլ Սաֆարովին 2012 թվականի օգոստոսի 31-ին Հունգարիան արտահանձնեց Ադրբեջանին, իսկ հաջորդ օրն իսկ երկրի նախագահի հրամանագրով նրան ներում շնորհվեց: Նա նաեւ մայորի կոչում ստացավ, բնակարան եւ վերջին 8 տարիներին աշխատավարձը: Ի պատասխան, Հայաստանը խզեց Հունգարիայի հետ դիվանագիտական հարաբերությունները: