Apple ընկերության մաքուր եկամուտը 2015թ. ֆինանսական տարվա առաջին քառորդում, որն ավարտվել է 2014թ. դեկտեմբերի 17-ին, ավելացել է 37 %-ով՝ մինչեւ ռեկորդային 18 մլրդ դոլարի, ասված է Apple-ի ֆինանսական հաշվետվությունում։

Ընկերության հասույթը եւս պատմական ռեկորդ է արձանագրել. 2014թ. սեպտեմբերից դեկտեմբերի վերջ ընկած հատվածում այն աճել է մոտ 30%-ով՝ հասնելով 74,6 միլիարդի։ Բաժնետոմսերի եկամուտն ավելացել է 48%-ով։

«Մենք ցանկանում ենք մեր օգտվողներին շնորհակալություն հայտնել հիանալի եռամսյակի համար», — հայտարարել է ընկերության գլխավոր տնօրեն Թիմ Կուկը։ Ըստ Apple-ի ղեկավարի՝ տեկորդային շահույթ է ստացվել  iPhone-ի եւ Mac-ի վաճառքից, օնչպես նաեւ  App Store-ում ծառայությունների իրացումից։

Ընկերությունը վաճառել է ռեկորդային 74,5 մլն iPhone սմարթֆոն՝ 2014 թ. սեպտեմբերի վերջից մինչեւ դեկտեմբերն ընկած ժամանակահատվածում՝ 46%-ով ավելի, քան նախորդ տարի: Ըստ ընկերության՝  նա մեկ ժամում վաճառել է շուրջ 34 հազար iPhone:

Apple-ի շահույթի շուրջ 69%-ը բաժին է ընկել iPhone-ին: Ավելացել է նաեւ Apple –ի շահույթը Mac-ի վաճառքից. հաշվետու եռամսյակի ընթացքում ընկերությունը վաճառել է շուրջ 5,5 մլն սարք՝ նախորդ տարվա  4,8 մլն-ի համեմատ:

Սակայն Apple-ի iPad պլանշետների վաճառքը նվազել է:  Մեկ եռամսյակի ընթացքում Apple-ն իրացրել է 21,4 մլն պլանշետ՝  նախորդ տարվա համեմատ 4,6 մլն-ով պակաս, հայտնում է  Lenta.ru-ն:
Շարունակում է աճել iTunes –ի եւ Apple-ի այլ ծառայություններից ստացված շահույթը՝ 4,8 մլրդ դոլար կամ 6,5% շահույթ:

Հաշվետվությանը զուգահեռ՝ Apple –ի արժեթղթերը Nasdaq բորսայի փակվելուց հետո աճել են 5,3% -ով մինչեւ 114,9 դոլար, առեւտրի հիմնական շրջանի փակման 109,14 դոլարի համեմատ: