ՄԻԵԴ-ում «Փերինչեքն ընդդեմ Շվեյցարիայի» դատական նիստին Դողու Փերինչեքի փաստաբան Մեհմեդ Ջենգիզը հայտարարել է, թե ՄԻԵԴ-ը 1000 տարի էլ քննի, Փերինչեքի մոտ ռասիզմ եւ խտրականություն չի կարող գտնել։
Թուրքական OdaTV կայքի փոխանցմամբ՝ Թուրքիայի «Աշխատավորական» կուսակցության նախագահ Դողու Փերինչեքի փաստաբան Մեհմեդ Ջենգիզն իր ելույթում հիշեցրել է, որ Փերինչեքը սոցիալիստ է եւ քրդերի հանդեպ ռասիզմի դեմ է դուրս եկել Թուրքիայում, որի համար ժամանակին փակվել էր նրա գլխավորած «Սոցիալիստական» կուսակցությունը։
«ՄԻԵԴ-ն էլ իր հերթին օրենքին դեմ էր համարել այդ կուսակցության փակումը։ 1000 տարի էլ քննեք, Դողու Փերինչեքի մոտ ռասիզմ եւ խտրականություն չեք կարող գտնել։ Փերինչեքն իր ամբողջ կյանքը պայքարել է խտրականության դեմ եւ Եվրոպայից պարգեւներ ստացել։ Փերինչքը շվեցարական դատարանում ասել է, որ խտրականությունն իր համար անպատվություն է»,-ասել է Փերինչեքի փաստաբանը։
Փերինչեքի փաստաբանի ելույթից հետո խոսքը տրվել է Դողու Փերինչեքին։
Հիշեցնենք, որ 2008 թ. Շվեյցարիայի դատարաններից մեկը Թուրքիայի բանվորական կուսակցության նախագահ Դողու Փերինչեքին դատապարտել էր Հայոց ցեղասպանությունը ժխտելու համար: Փերինչեքը դիմել էր ՄԻԵԴ, եւ անցյալ տարվա դեկտեմբերին եվրոպական դատարանը բավարարել էր Շվեյցարիայի դեմ նրա հայցը: Շվեյցարիան բողոքարկել է ՄԻԵԴ-ի վճիռը: