Անցած տարին Հայաստանի համար, ի թիվս այլոց, նշանավորվեց նաեւ ազգային արժույթի թուլացմամբ: ԱՄՆ դոլարի ամսական միջին անվանական փոխարժեքը, որը հունվարին 407,35 դրամ էր,դեկտեմբերին աճեց 463,53 դրամի:Այսինքն օրացուցային տարվա ընթացքոււմ դոլարը դրամի նկատմամբ ամրապնդվեց 14%-ով: Սկանդալային ռեկորդ սահմանվեց դեկտեմբերի 17-ին՝ 1 դոլարն արժեցավ 527,2 դրամ:
Հյուսիսային հարեւան Ռուսաստանում ռուբլին տառացիորեն փլուզվեց: Բայց նման ընդարձակ երկրում դժվար է վերահսկել եւ կարգավորել արժութային շուկան: Այլ բան է Հայաստանում, որտեղ հեշտ էր խոշոր սպեկուլյանտներին հայտնաբերելը եւ նրանց նկատմամբ ազդեցության օրինական եւ այլ միջոցներ կիրառելը...
Տարադրամի շուկայի վայրիվերումների ֆոնին վատացել են նաեւ երկրի տնտեսության այլ կարեւորագույն երեւույթներ: Օրինակ՝ հանքարդյունահանման ոլորտում նկատելի են անբարենպաստ միտումներ: Հունվար-նոյեմբերի տվյալներով՝ այս բնագավառում արտադրանքի տարեկան ծավալը կրճատվել է 8,2%-ով: Այս ոլորտում առաջատարը մետաղական հումքի արդյունահանումն է, որը գրեթե ամբողջությամբ արտահանվում է:
Լոնդոնի բորսայում անցյալ տարի պղնձի պահանջարկը նվազել է: Ըստ անցյալ տարվա հունվար-սեպտեմբերի տվյալների՝ Հայաստանում պղնձի հանքանյութի եւ խտանյութի միջին մաքսային արժեքը նվազել է 1,3 անգամ: Նշենք, որ անցյալ տարի պղնձի գների ամենամեծ անկումը տեղի էր ունեցել IV եռամսյակում, որը շարունակվում է այս տարվա հունվարին:
Ըստ հունվար-նոյեմբեր ամիսների տվյալների՝ Հայաստանում կոնյակի արտադրությունը կրճատվել է 6,6%-ով: Կոնյակը ավանդաբար արտահանվող ապրանքներից երկրորդ տեղում է իր ծավալով: Ալկոհոլային խմիչքների արտահանման ամենամեծ նվազումը հունվար-սեպտեմբերին գրանցվել է դեպի Ռուսաստան ուղղությամբ՝ 10,0%: Այնուհետեւ Ուկրաինան է՝ 18,5% կրճատմամբ: Կան հայկական կոնյակ ներկրող խոշոր երկրներ, որոնք ներկայումս ներգրավված են հակամարտությունում:
Ներքևում բերված գրաֆիկից տեսանելիորեն երևում է Հայաստանի տնտեսության երեք կարևորագույն ճյուղերի արտադրանքի ծավալի դինամիկայի անկայունությունը (անցյալ տարվա յուրաքանչյուր ամիսը տոկոսներով նախանցյալ տարվա համապատասխան ամսվա նկատմամբ):