Հայ հոգեւորականը կանգնած է ամեն մի զինծառայողի կողքին, աղոթում է նրա համար եւ կատարում իր պարտականությունները: Այս մասին այսօր՝ հունվարի 28-ին, «Եռաբլուր» զինվորական պանթեոնում, NEWS.am-ի հետ զրույցում ասաց Զինված ուժերի հոգեւոր առաջնորդ Վրթանես եպիսկոպոս Աբրահամյանը՝ պատասխանելով հարցին, թե հոգեւորականի ներկայությունը որքանով է կարեւոր հայ զինծառայողի համար:
«Մեր հոգեւոր սպասավորների անմիջական ներկայությամբ մենք լիարժեք կարողանում ենք կատարել այն պատասխանատու ծառայությունը, որն իրականացնում է Զինված ուժերը, հայոց բանակը: 1997-ից մենք պաշտոնապես մասն ենք կազմում հայոց բանակի, իսկ նախքան այդ Արցախյան շարժման ժամանակ մեր հոգեւորականները լիարժեք մասնակցում էին այն գործողություններին»,- ասաց Վրթանես եպիսկոկոպոս Աբրահամյանը:
Եպիսկոպոսի խոսքով՝ հայոց բանակի կարեւորագույն ձեռքբերումներից է, որ ժողովրդի անվտանգությունը լիարժեք պաշտպանված է, ինչը նշանակում է, որ բանակն Աստծո կամոք կարողանում է իր առաքելությունը կատարել: