Ադրբեջանը ծրագիր ունի սահմանին լարվածությունը շարունակել մինչեւ ապրիլի 24-ը։ Այս մասին այսօր՝ հունվարի 28-ին լրագրողների հետ հանդիպմանը հայտարարեց գեներալ-մայոր, Արցախյան ազատամարտի հերոս Արկադի Տեր-Թադեւոսյանը։
«Ադրբեջանը հույս ունի երկարատեւ լարվածություն ստեղծել, իբրեւ թե Հայաստանը պետք է թուլանա։ Բայց ի տարբերություն իրենց՝ մենք մոնոլիտ ենք, միասնական ազգ ենք եւ կպաշտպանենք մեր հայրենիքը»,- ասաց Տեր-Թադեւոսյանը։
Արկադի Տեր-Թադեւոսյանը վերհիշեց նաեւ Արցախյան ազատամարտի տարիները՝ հիշեցնելով, որ այդ հերոսական պայքարը հնարավոր դարձրեց Արցախի անկախության եւ պետականության հռչակումը։
«Երբ եկա Հայաստան, որպեսզի գլխավորեմ ձեւավորված զորքերը, ես այդ մարդկանց չէի հասկանում, ինչու՞, որովհետեւ զենք չկար, տասը հոգու համար երեք-չորս որսորդական հրացան էր, եւ պետք է կռվեին այն ժամանակ Ադրբեջանի խորհրդային բանակի դեմ։ Հիմա Ադրբեջանում ասում են՝ ռուսական բանակը օգնել է հայերին։ Նրանք չեն օգնել մեզ, այն հերոսական գենը, որը մենք ունենք, հրաշքներ էր գործում կռվի դաշտում։ Տղաները պատրաստ էին մեռնել՝ պաշտպանելով մեր հայրենիքը, իսկ ես որպես հրամանատար երջանիկ մարդ էի, որ մարդը գալիս է, եւ պետք չէ նրան ստիպել կռվի գնալ։ Մենք կամ պետք է մեռնեինք, կամ ողջ մնայինք։ Այդ հերոսական փուլը մենք անցանք, հաղթանակ գրանցեցինք։ Եվ հասանք անկախության եւ պետականություն ձեռք բերեցինք, որոնք պետք է պահպանենք»,-ասաց Արկադի Տեր-Թադեւոսյանը։