Ադրբեջանի հերթական դիվերսիայի ժամանակ վիրավորված հայ զինծառայող Հովհաննես Ավանեսյանի վիճակը բավական ծանր է՝ հաշվի առնելով ստացված վնասվածքը եւ կատարված վիրահատությունը, հունվարի 28-ին լրագրողներին հայտնել է Կենտրոնական կայազորի զինվորական հոսպիտալի տնօրեն Արամ Ասատրյանը, որը տոնական օրն արժանացել է «Մխիթար Հերացի» շքանշանի՝ ՀՀ նախագահ Սերժ Սարգսյանի հրամանագրով:
«Մենք անում ենք հնարավոր ամեն ինչ՝ նրա վիճակը կայունացնելու եւ ողնաշարի վիրահատության նախապատրաստելու համար: Վնասված է նաեւ նրա լյարդը: Կարող են լինել հետվիրահատական բարդություններ: Մենք ուշադիր հետեւում ենք զինծառայողի առողջական վիճակին, որպեսզի այն չվատանա», - նշել է Ասատրյանը: Նա հավելել է, որ առողջության կայունանալուց հետո զինծառայողը վիրահատվելու է:
Նա վստահեցրել է, որ ԶՈՒ-ում բժշկությունը բարձր մակարդակի է: «Այս 23 տարվա ընթացքում մեծ առաջընթաց է գրանցվել: Այսօր մեր մասնագետները լավ պատրաստված են», - նշել է Արամ Ասատրյանը:
Հիշեցնենք, որ հայ զինծառայող Հովհաննես Ավանեսյանին Բերդի հիվանդանոցից տեղափոխել են Կենտրոնական կայազորի զինվորական հոսպիտալ:
