ԱՄՆ Միչիգան նահանգի Գրանդ Ռափիդս քաղաքում հային մինչեւ 5 տարվա ազատազրկում է սպառնում իր զարմիկի կնոջը վախեցնելու համար, որին նա փորձել է սպանել: Այս մասին հաղորդում է MLive.com-ը:
Վարուժան Գրիգորյանը համաձայնել է դատարանի առաջարկած գործարքին՝ հայտարարելով, որ մտադիր չէ վիճարկել ծանրացուցիչ հանգամանքներում իր զարմիկի կնոջը հետապնդելու մեղադրանքը: Փոխարենը դատախազությունը համաձայնել է հրաժարվել վկային վախեցնելու մեղադրանքից, որը կարող էր հանգեցնել մինչեւ 10 տարվա ազատազրկման:
Ավելի վաղ Վարուժանի զարմիկ Արթուր Գրիգորյանը փորձել է սպանել սեփական կնոջը, որի համար կալանավորվել եւ կանգնել է շրջանային դատարանի առջեւ: Հենց այդ ժամանակ դատարանում դետեկտիվները տեսել են, թե ինչպես է Վարուժանը կուրծք ծեծում ու բղավում, որ սպանելու է ենթադրյալ զոհին:
Հաղորդվում է, որ սեպտեմբերի 22-ին Վարուժան Գրիգորյանը հետապնդել է կնոջը, երբ նա տուն գնալիս է եղել: Նկատելով հետապնդումը, կինը զանգահարել է 911 ծառայություն: Դատախազությունը նշում է, որ Վարուժան Գրիգորյանը նաեւ այլ սպառնալիքներ է հնչեցրել այդ կնոջ հասցեին: Նա նույնիսկ զանգահարել է ենթադրյալ զոհի մորը՝ Հայաստան, եւ սպառնացել նրան:
Վարուժան Գրիգորյանը սեպտեմբերի 22-ից հունվարի 26-ը գտնվել է Քենթ շրջանի բանտում, հետո ազատ է արձակվել գրավի դիմաց: Նրա դատավճիռը կկայացվի փետրվարի 26-ին: Իսկ նրա զարմիկ Արթուր Գրիգորյանին սպառնում է ցմահ ազատազրկում՝ սեփական կնոջ դեմ մահափորձի մեղադրանքով: