Ռումինիայում ավարտվել է ամենախոշոր կոռուպցիոն գործընթացը՝ կապված ռազմավարական օբյեկտների մասնավորեցման եւ օտարերկրյա լրտեսության հետ:
Բարձրագույն վճռաբեկ դատարանը վճիռ է կայացրել էկոնոմիկայի նախկին նախարար Կոդրուցու Շերեշի եւ կապի նախկին նախարար Զոլտ Նագիի նկատմամբ: Շերեշը դատապարտվել է 4,5 իսկ Նագին՝ 4 տարվա ազատազրկման, հաղորդում է Reuters-ը:
Շերեշը աջակցել է Ռումինիայի կառավարության որոշման կայացմանը, որով 2004-ին Petrom նավթային ընկերության 8 տոկոսը վաճառվել է ավստրիական OMV խմբին՝ 1,5 մլրդ եվրոյով:
2008-ին նախկին նախարարներ Շերեշն ու Նագին մասնակցել են ռումինական Electrica Muntenia Sud էլեկտրամատակարարման խոոշորագույն ընկերության վաճառքին: Արդյունքում ընկերության 64,4 տոկոս բաժնետոմսերը անցել են իտալական Enel ընկերությանը՝ 820 մլն եվրոյով:
Դատարանը վճիռ է կայացրել նաեւ լրտեսության դրվագով: Credit Suisse բանկի Կենտրոնական եւ Արեւելյան Եվրոպայի, նախկին ԽՍՀՄ երկրների, Իսրայելի եւ Թուրքիայի հարցերով ներդրումային գործունեության գծով գլխավոր տնօրեն ռուսական արմատներով ամերիկացի Վադիմ Բենյատովը հեռակա կարգով դատապարտվել է 4,5 տարվա ազատազրկման, հաղորդում է NEWSru.com-ը:
