Ղարաբաղյան հակամարտության գոտում հրադադարի խախտումների մեղավորին գտնելու փոխարեն ԵԱՀԿ ՄԽ համանախագահներն ամեն անգամ ընդհանուր բնույթի հայտարարություններ են անում՝ դիմելով հակամարտ երկու կողմերին: NEWS.am-ի թղթակցի հետ զրույցում նման կարծիք հայտնեց ԼՂՀ ԱԺ պատգամավոր Վարդգես Բաղիրյանը:
Սա, ըստ նրա, շարունակվում է արդեն 20 տարուց ավելի: «Իհարկե, ԵԱՀԿ ՄԽ-ն կատարում է իր որոշակի առաքելությունը. Ասել, թե այն ոչինչ չի անում, սխալ կլինի:
Բայց կարծում եմ, որ արդեն ժամանակն է իրերն իրենց անուններով կոչելու: Ընդ որում, ոչ միայն ասելու՝ ով է մեղավոր, այլեւ նման երեւույթները կանխելու համար քայլեր ձեռնարկելու», - նշել է Բաղիրյանը: Ըստ պատգամավորի՝ ընդհանուր բնույթի հայտարարությունները որեւէ լավ արդյունքի չեն հանգեցնի: «Հարկ է նաեւ ընդգծել, որ հակամարտության իրական կողմերը Ղարաբաղն ու Ադրբեջանն են: Այլ հարց է, որ վերջերս Ադրբեջանը նաեւ Հայաստանի տարածքի հանդեպ է ոտնձգություններ անում: Ամենայն հավանականությամբ՝ Ադրբեջանը որոշել է ինչ-որ նոր մարտավարության անցնել», - ասաց Վարդգես Բաղիրյանը: Ըստ նրա՝ սա կապված է Ցեղասպանության 100-րդ տարելիցի, ինչպես նաեւ աշխարհաքաղաքական հարցերի հետ: Ադրբեջանը, հավելել է պատգամավորը, ցանկանում է անընդհատ «կրակը վառ պահել»:
Հիշեցնենք, որ Կրակովում Ադրբեջանի արտգործնախարար Էլմար Մամեդյարովի հետ հանդիպման ավարտին համանախագահների տարածած հայտարարությունում մասնավորապես ասված է. «Բռնության աճը, որը սկսվել է անցյալ տարվանից, պետք է դադարեցվի, վերականգնելու համար վստահությունը՝ ԼՂՀ խաղաղության գործընթացում աճ գրանցելու համար։ Մենք կոչ ենք անում Ադրբեջանին հավատարիմ մնալ հրադադարի պահպանման ռեժիմին։ Մենք կոչ ենք անում նաեւ հայկական կողմին՝ միջոցներ ձեռնարկել լարվածությունը նվազեցնելու ուղղությամբ»:
Այսպիսով, փաստորեն առաջին անգամ ԵԱՀԿ ՄԽ համանախագահները հրադադարի ռեժիմի խախտման պատասխանատու ուղղակիորեն անվանել են Ադրբեջանին:
